ՀՀ Ազգային վիճակագրական ծառայությունը (այսուհետ՝ Ծառայություն) ղեկավարում է նրա նախագահը, որը նշանակվում և ազատվում է Հանրապետության Նախագահի կողմից` 6 տարի ժամկետով:
Ծառայության նախագահ կարող է նշանակվել բարձրագույն տնտեսագիտական կրթություն և վիճակագրության բնագավառում աշխատանքի փորձ ունեցող Հայաստանի Հանրապետության քաղաքացին:
Ծառայության նախագահը չի կարող զբաղեցնել պետական այլ պաշտոն կամ կատարել վճարովի այլ աշխատանք, բացի գիտական, մանկավարժական և ստեղծագործական աշխատանքից:
Ծառայության նախագահը խորհրդակցական ձայնի իրավունքով մասնակցում է կառավարության նիստերին և կարող է կարծիք հայտնել քննարկվող հարցերի վերաբերյալ:
Ծառայության նախագահը`
ա) կազմակերպում է պետական վիճակագրական աշխատանքների ծրագրի կատարումը.
բ) ներկայացնում է Ծառայությունը ներքին և արտաքին հարաբերություններում.
գ) իրականացնում է օրենքով սահմանված այլ լիազորություններ:
Ծառայության նախագահի լիազորությունները կարող են վաղաժամկետ դադարեցվել`
ա) նրա հրաժարականի դեպքում.
բ) նրա` Հայաստանի Հանրապետության քաղաքացիությունը դադարելու դեպքում.
գ) նրան դատարանի վճռով անգործունակ կամ սահմանափակ գործունակ ճանաչելու կամ օրինական ուժի մեջ մտած վճռով դատապարտելու դեպքում.
դ) նրա մահվան դեպքում:
Ծառայության նախագահի տեղակալներին նշանակում է Վիճակագրության պետական խորհուրդը` Ծառայության նախագահի ներկայացմամբ:
