Արցախի Հանրապետության Ազգային ժողովի նախագահն այսօր հրավիրված նիստում պատգամավորներին ներկայացրեց ԱԺ հայտարարության նախագիծը։

«Ադրբեջանի զինված ուժերը հերթական անգամ կոպտորեն խախտելով 2020 նոյեմբերի 9-ին ընդունված եռակողմ հայտարարության՝ Լեռնային Ղարաբաղում հաստատված հրադադարի ռեժիմը, հունիսի 27-ի լույս 28-ի գիշերվա ժամը 1։30-ից սկսած՝ տարբեր զինատեսակներից կրակ են բացել ԱՀ տարածքի ուղղությամբ, որի հետևանքով զոհվել են մեր 4 հայրենակիցները։

Ադրբեջանի կողմից Արցախի լիակատար շրջափակման պայմաններում հրետանային միջոցների և անօդաչու թռչող սարքերի կիրառմամբ ԱՀ քաղաքացիների այս հերթական սպանությունը վկայում է, որ այդ հանրապետության ռազմաքաղաքական ղեկավարությունը անտեսելով միջազգային հեղինակավոր կառույցների կոչերն ու որոշումները, խաղաղության և երկխոսության կեղծ օրակարգերով սքողված ցեղասպանական գործողություններով ձգտում է ռազմական, քաղաքական, տնտեսական գործիքակազմերի կիրառմամբ հասնել իր հիմնական հպատակին՝ Արցախի վերջնական հայաթափմանը։

Ուշագրավ և հատկանշական է, որ Ադրբեջանի կողմից հրադադարի ռեժիմի պարբերաբար իրականացվող խախտումների այս նոր միջադեպը նախորդ դեպքերին համանման նույնպես արձանագրվել է այն ժամանակ, երբ ներկայումս ԱՄՆ-ի պետքարտուղարի միջնորդությամբ Վաշինգտոնում տեղի են ունենում Հայաստանի և Ադրբեջանի արտաքին գործերի նախարարների հերթական բանակցությունները հայ-ադրբեջանական հակամարտության խաղաղ կարգավորման հարցերի շուրջ։ Դա, անշուշտ, ևս մեկ անգամ վկայում և հաստատում է, որ խաղաղության պայմանագրի շուրջ տեղի ունեցող այս բանակցությունները նույնպես իրականում ոչ այլ ինչ են, քան տարածաշրջանում տևական խաղաղության ու կայունության հաստատման մթնոլորտի ձևավորման նմանակում, իբր թե միջազգային ջանքերի համատեքստում։

Խորապես անհանգստացած առկա վտանգավոր իրողությամբ, Արցախի Հանրապետության ժողովրդի անունից դիմում ենք.

ՄԱԿ-ի Անվտանգության խորհրդին

ԵԱՀԿ ՄԽ համանախագահ երկրների ղեկավարներին

Կարեկցանքի հայտարարություններից, հորդորներից և խորհուրդներից զատ ձեռնարկել կոնկրետ գործնական քայլեր, մասնավորապես, պատժամիջոցներ կիրառել Ադրբեջանի նկատմամբ, զսպելով նրա ագրեսիվ նկրտումները։ Համոզված ենք, որ երկակի ստանդարտներով գործելոաոճն ավելի է ոգևորում Ադրբեջանին, նրան դարձնելով սանձարձակ և անվերահսկելի։

Ռուսաստանի Դաշնությանը

Խաղաղապահ առաքելության շրջանակում առավել կոշտ միջոցներով կասեցնել Ադրբեջանի հակամարդկային ցեղասպան գործողությունները։

Վաշինգտոնյան բանակցություններում ՀՀ պատվիրակությանը՝

Անհապաղ դադարեցնել մեկնարկած բանակցությունները, մինչև Արցախի հետ շփման գծում և ՀՀ սահմաններում լիակատար հրադադարի հաստատումը և այն պահպանելու փաստաթղթային երաշխիքների տրամադրումը։ Հակառակ պարագայում բանակցությունների շարունակումը կնշանակի ադրբեջանական կողմի ագրեսիվ պահվածքի խրախուսում և միջազգային մակարդակով՝ արտոնություն»։

Արցախի ԱԺ-ն հայտարարությունն ընդունեց միաձայն։