ՀՅԴ անդամ, ԱԺ «Հայաստան» խմբակցության պատգամավոր Թադևոս Ավետիսյանի օգնական Գերասիմ Վարդանյանը կմնա կալանքի տակ, հայտնել է փաստաբան Բենիկ Գալստյանը։

«ՀՀ վերաքննիչ քրեական դատարանը՝ նախագահությամբ դատավոր Արսեն Նիկողոսյանի, հերթական անգամ մերժել է Գերասիմ Վարդանյանին կալանքի տակ պահելու վերաբերյալ դատավոր Կարեն Ֆարխոյանի կողմից կայացված որոշման դեմ բերված իմ վերաքննիչ բողոքը։

Հետաքրքիր զուգադիպությամբ Գերասիմին կալանքի տակ պահելու երկու որոշումների դեմ վերաքննիչ բողոքները երկու դեպքում էլ մակագրվել են դատավոր Արսեն Նիկողոսյանին։

Պետք է փաստել, որ դատավոր Նիկողոսյանը չափազանց գրագետ իրավաբան է, ինչը չես ասի շատ դատավորների մասին։

Սակայն այդ հանգամանքն էլ ավելի է ծանրացնում դատավոր Նիկողոսյանի դրությունը. նա, որպես իրավաբան, պարզապես չէր կարող չհասկանալ, որ Գերասիմին կալանքի տակ պահելու հիմքերը պարզապես մտացածին են, ուղղակի չէր կարող չընկալել Գերասիմին կալանքի տակ պահելու իրական նպատակը, որը, մեղմ ասած, քրեական դատավարության և, առհասարակ, իրավաբանության հետ որևէ առնչություն չունի։

Ամեն դեպքում, բոլորի համար ամեն ինչ պարզ է. Գերասիմը կալանքի տակ է, որովհետև օրվա իշխանությունները, մեղմ ասած, «չեն սիրում» նրան, իսկ չեն սիրում մի պարզ պատճառով՝ Գերասիմը չի ընդունել այն թեզը, որ Հայաստանը վերջնականապես պարտված է, իսկ Արցախի հարցը փակված է, պայքարել է այդ թեզը շրջանառության մեջ դնողների և այն տարածողների դեմ։

Իսկ Գերասիմի նման տղերքի պայքարը բանտով կասեցնել հնարավոր չէ»,- սոցցանցի իր էջում գրել է փաստաբան Բենիկ Գալստյանը։