Երևանի քաղաքապետ Հրաչյա Սարգսյանը քաղաքապետարանի հանրակրթության վարչությանը հանձնարարել էր մայրաքաղաքի հանրակրթական դպրոցների 1-4-րդ դասարաններում կարճ թելադրության մրցույթ կազմակերպելու նպատակով համագործակցել հրատարակիչների հետ՝ տեքստի պատրաստման ուղղությամբ։
Սեպտեմբերի 5-ի գործակարգավարական խորհրդակցության ընթացքում քաղաքապետին զեկուցվեց, որ փետրվար ամսին՝ Գրքի տոնի և «Մայրենի» առարկայական շաբաթվա ընթացքում կներառվի միջոցառումը, իսկ մինչ այդ հրատարակիչների հետ աշխատանք կտարվի տեքստի պատրաստման համար։
Քաղաքապետը չհամաձայնեց ժամկետների հետ՝ նշելով, թե ինչու՞ է փետրվար ամսին կազմակերպվում, դասերն արդեն սկսվել են։
«Եկեք հոկտեմբերին անենք, ուսուցիչների օրն է լինելու, եկեք դրա շրջանակներում անենք, ինչու՞ ենք մինչև փետրվար սպասում, մինչև փետրվար 7 ամիս կա»,-նշեց Հրաչյա Սարգսյանը։
Արդյունքում որոշվեց երկու անգամ նման թելադրություն անցկացնել՝ մեկը հոկտեմբերին, մյուսը՝ փետրվարին։
