«Իմ կնոջ ֆեյսբուքյան էջին ես առանձնապես չեմ հետևում, բայց այդ դեպքի հետ կապված իմ կինը պատասխանել է, մտեք այդ գրառման տակ կկարդաք նրա մեկնաբանությունը»,-կառավարության ճեպազրույցների սրահում հայտնեց ԿԳՄՍ նախարար Վահրամ Դումանյանը՝ պատասխանելով լրագրողի հարցին, թե ինչպես է նա վերաբերում այն փաստին, որ իր կինը ֆեյսբուքում կիսում է իր քաղաքական թիմի հասցեին սուր քննադատություն պարունակող գրառումները:

Ըստ նախարարի, այն ինչ նկատի է ունեցել այդ գրառումն արած անձը, իր կինն ընդհանրապես չի էլ նկատել:

«Տվյալ անձը, որը նման աղմուկ է բարձրացրել, գիտեք ի՞նչ է արել՝ էլեմենտար մանիպուլյացիա և մոնտաժ է արել: Խոսքը վերաբերել է լրիվ այլ բանի, բայց այդ մարդն իրեն հետաքրքրող, սնուցող մի միտք է գտել և այն է տարածել, ինչն իմ տիկինը չէր էլ նկատել և այդ մասին պարզաբանել է»,-բացատրեց նախարարը:

Վահրամ Դումանյանը հայտարարեց, որ այդ անձին խորհուրդ է տալիս լսել տաղանդավոր երգիչ Վլադիմիր Վիսոցկու շատ հայտնի երգը, և կեղտոտ կոշիկներով չմտնել սրբավայր և չապականել, այլ զբաղվել հանօգուտ գործով:

«Չի կարելի մարդկանց դժբախտության վրա կառուցել երջանկություն»,-ասաց նախարարը:

Հիշեցնենք, որ օգոստոսի 29-ին Դումանյանի կինը կիսվել էր Ա. Արամյան անունով օգտատիրոջ գրառմամբ, որում ասված է եղել «Շնորհավորում եմ ձեզ՝ Բաքուն նվաճող առյուծներ։ «Քաղաքացիական պայմանագրի» մարմնավաճառների սերունդն առանց որևէ կրակոցի հայկական Աղավնոն թուրքերին հանձնեց։ Օգոստոսի 25-ին թուրքն առանց կրակոցի մտավ հայկական Աղավնո»։

Վահրամ Դումանյանի կինն էլ, կիսվելով գրառմամբ, մեկնաբանել էր. «Թուրքը մտավ Աղավնո։ Խելագարվել կարելի է: Մինչդեռ մեզ մոտ խրախճանքներ ու փառատոններ են… Զուգահեռ իրականություն, անտարբեր աշխարհ և ցավ… Եվ մեզանից յուրաքանչյուրն այս ամենի մասնակիցն է»։