Պաշտոնական իմ դիրքից ելնելով կատարել եմ մի շարք աշխատանքներ. հրամանագրեր ու օրենքներ ստորագրել, քաղաքացիություն շնորհել, քաղաքացիությունից որոշ մարդկանց զրկել, տարբեր հանդիպումներ, կառավարության, Ազգային ժողովի, ՀԿ-ների հետ աշխատանք և այլն: Այս մասին այսօր՝ հունիսի 22-ին, հանրային հեռուստաընկերության եթերում տված հարցազրույցի ժամանակ ասաց նախագահ Վահագն Խաչատուրյանը՝ պատասխանելով այն հարցին, թե ինչ է արել իր պաշտոնավարման հարյուր օրերի ընթացքում:
Խոսելով իր լիազորությունների սահմանափակության մասին նախագահն ասաց. «Նույնիսկ այս սահմանափակ լիազորությունները, որոնք ինձ տրված են, դրանցով կարելի է ազդեցություն ունենալ՝ կախված նրանից, թե ինչպես եք աշխատում Ազգային ժողովի և կառավարության հետ: Պառլամենտական երկրներում իսկապես նախագահական ինստիտուտի կարիք կա, որը հնարավորություն է տալիս իշխանության մյուս օղակներին ավելի հավասարակշռված աշխատել և սահմանադրության կատարմանը հետևել, որպեսզի իշխանազանցություն չլինի:
Ես առանց հիմնավորման որևէ հարցում իշխանության հետ հակադրվելը անիմաստ եմ համարում: Կառավարության և Ազգային ժողովի ներկայացուցիչների հետ աշխատնքային խոսակցություններ եղել են և առաջացած խնդիրները մենք լուծել ենք այդ քննարկումների ընթացքում: Ես կողմնակից եմ այդպիսի աշխատանքին»,- ասաց նա:
Վերջինս նշեց, որ իրենց բոլոր տեսակետներն ու առարկությունները հաշվի են առնվում:
Պատասխանելով այն հարցին, թե արդյոք այս հարյուր օրերի ընթացքում Խաչատուրյանը հանդիպել է ընդդիմության ներկայացուցիչների հետ, նախագահն ասաց, որ բաց է ցանկացած քննարկումների և երկխոսության համար, բայց մի պայման կա:
«Եթե քննարկումը լինում է քաղաքակիրթ ձևով և բառապաշարով, հայերեն, ինչպես նաև հռետորաբանությունը պետք է լինի շատ համապատասխան, որովհետև ես չեմ փորձելու որևէ մեկին դաստիարակել, քանի որ այդ տարիքում չենք: Բացի դա, եթե քաղաքականության մեջ ենք, ուրեմն կան որոշ գրված ու չգրված կանոններ, որոնք բարոյական դաշտում են գտնվում: Ես այսօր էլ եմ ասում, որ պատրաստ եմ այդ երկխոսություններին, բայց ընդդիմությունը առաջին օրից այդ երկխոսությունից տարբեր պատճառներով հրաժարվել էր ու մինչև հիմա էլ նույն իրավիճակն է»,- ասաց նա:
Վերջինս նշեց, որ ինքը պատրաստ է, բայց ընդդիմությունը նման ցանկություն չունի:
