Ժողովրդական պատգամավորները Գերագույն Ռադայում գրանցել են 2022 թվականի փետրվարի 24-ից Ուկրաինայում շարունակվող Ռուսաստանի հանցավոր գործողությունները որպես ուկրաինացի ազգի ցեղասպանություն ճանաչելու մասին նախագիծ։ Խորհրդարանի կայքում հրապարակվել է «Ռուսաստանի Դաշնության կողմից ուկրաինացի ազգի ցեղասպանության մասին» թիվ 7250 բանաձևի նախագծի տեքստը, հայտնում է «Ուկրինֆորմ»-ը։

Այսպիսով, փաստաթուղթը ենթադրում է, որ 2022 թվականի փետրվարի 24-ից Ուկրաինայի տարածքում Ռուսաստանի շարունակվող հանցավոր գործողությունները կճանաչվեն որպես ուկրաինացի ազգի ցեղասպանություն։

Այդ կապակցությամբ Ուկրաինայի իրավապահ մարմիններին նախատեսվում է հանձնարարել ձեռնարկել համապարփակ միջոցներ՝ ապահովելու ցեղասպանության հանցագործության հետաքննությունը և հանցագործներին ներպետական ​​և միջազգային իրավական դատավարության մեխանիզմներով օրենքով սահմանված քրեական պատասխանատվության ենթարկելու համար։

Միաժամանակ նախատեսվում է հանձնարարել Ուկրաինայի նախարարների կաբինետին միջոցներ ձեռնարկել ուկրաինացի ազգի ցեղասպանության զոհերի հիշատակը հավերժացնելու, տուժածներին և զոհվածների ընտանիքներին օգնություն ցուցաբերելու համար։

Բացի այդ, փաստաթղթում առաջարկվում է կոչ անել օտարերկրյա պետություններին և միջազգային կազմակերպություններին աջակցել Ռուսաստանի, նրա զինված կազմավորումների և Ուկրաինայի տարածքում ռեպրեսիվ մարմինների հանցագործությունների հետաքննությանը՝ ապահովելու այդ հանցագործությունների կազմակերպիչների և կատարողների համար պատժի անխուսափելիությունը։

Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:

ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։

Գերագույն Ռադան Ուկրաինայում ռազմական դրություն է մտցրել։