Նոտարի գործունեությունը կասեցվում է`
1) եթե երեք ամիս անընդմեջ չի վճարել նոտարական պալատին վճարվող անդամավճարները.
2) «Նոտարիատի մասին» օրենքով նախատեսված դեպքերում՝ մինչև 6 ամիս ժամանակով (օրինակ՝ երբ նոտարի նկատմամբ կիրառվում է որպես կարգապահական տույժ).
3) եթե նոտարը դատական կարգով ճանաչվել է անվճարունակ՝ անվճարունակության ողջ ժամանակահատվածում.
4) օրենքով նախատեսված այլ դեպքերում, կարգով և ժամկետներում:

Նոտարական գործունեության կասեցման մասին որոշումը կայացնում է արդարադատության նախարարը` նշելով գործունեության կասեցման ժամկետը:

Վերը նշված 1-ին ենթակետով նախատեսված դեպքում նոտարի գործունեությունը կասեցվում է մինչև անդամավճարի վճարումը:

Նոտարի գործունեությունը կասեցված է համարվում կասեցման մասին որոշումը (հրամանը) նրան հանձնելու օրվան հաջորդող օրվանից:

Գործունեությունը կասեցված նոտարն իրավունք չունի կատարել նոտարական գործողություններ՝ մինչև կասեցման ժամկետի ավարտը: Նա իրավունք ունի իրականացնել նոտարական այլ գործունեություն:

Գործունեությունը կասեցված նոտարի կնիքը պահպանում է նոտարական պալատը` արդարադատության նախարարի սահմանած կարգով:

Նոտարն իրավունք ունի դատական կարգով բողոքարկել իր գործունեության կասեցման մասին որոշումը:

Իրավաբան.net