Օրենսդրությունը կարգավորել է նաև այնպիսի իրավիճակները, երբ անձը մահացել է, սակայն չի հասցրել ստանալ իրեն հասանելիք որոշ դրամական միջոցներ: Այժմ տեսնենք, թե ինչ դրամական միջոցների մասին է խոսքը:
Մասնավորապես` վճարման ենթակա, սակայն քաղաքացու կյանքի օրոք որևէ պատճառով չվճարված` աշխատավարձի, թոշակների, նպաստների և կյանքին կամ առողջությանը պատճառված վնասի հատուցման գումարներն ստանալու իրավունքը պատկանում է մահացածի ընտանիքի անդամներին, ինչպես նաև նրա խնամքի ներքո գտնվող անաշխատունակ անձանց:
Վերը նշված հիմքով գումարներ վճարելու վերաբերյալ պահանջները պետք է ներկայացվեն ժառանգության բացման օրվանից վեց ամսվա ընթացքում:
Մահացածին չվճարված գումարները վերոնշյալ հիմքով ստանալու իրավունք ունեցող անձանց բացակայության կամ նրանց կողմից այդ գումարները սահմանված ժամկետում վճարելու պահանջ չներկայացնելու դեպքում համապատասխան գումարները ներառվում են ժառանգության զանգվածի մեջ և ժառանգվում են քաղաքացիական օրենսգրքով սահմանված ընդհանուր հիմունքներով:
Աղբյուրը` Իրավաբան.net
