Գերմանիայում Հայաստանի դեսպանատնից հայտնում են․
«Դաշնային կառավարության խոսնակ Շտեֆեն Զայբերտը հայտնում է.
«Դաշնային կանցլեր Անգելա Մերկելը երեկ հեռախոսազրույց է ունեցել Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ:
Հեռախոսազրույցների ընթացքում քննարկվել է Ադրբեջանի և Հայաստանի միջև հակամարտության սրումը: Դաշնային կանցլերն ընդգծել է անհապաղ հրադադար հաստատելու և բանակցությունների սեղանին վերադառնալու հույժ անհրաժեշտությունը: ԵԱՀԿ Մինսկի խումբն այս հարցի լուծման փորձված հարթակն է: Հարևան պետությունները պետք է նպաստեն խաղաղ կարգավորմանը»»:
Հիշեցնենք, որ ՀՀ վարչապետ Նիկոլ Փաշինյանը Անգելա Մերկելին կոչ է արել գործադրել ամեն ջանք Թուրքիայի ապակառուցողական կեցվածքը սանձելու համար։
