Իրավապաշտպան Ժաննա Ալեքսանյանը ֆեյսբուքյան իր էջում գրել է․ «Կառավարության կողմից առաջադրված ՍԴ դատավորի թեկնածու Վահրամ Ավետիսյանը իր ֆեյսբուքյան էջում գրառում է կատարել՝ դիմելով «ընկերներին, բարեկամներին և համակիրներին» և արձագանքել իր թեկնածության շուրջ հնչած կարծիքներին. «Ինձ ճանաչող յուրաքանչյուր անձ ծանոթ է իմ մասնագիտական, բարոյական և մարդկային որակներին: Խնդրում եմ չմասնակցել ֆեյսբուքյան «պատերազմներին», որևէ մեկին որևէ բան ապացուցելու անհրաժեշտություն չկա»: Ապա ՍԴ դատավորի թեկնածուն որակավորել և տեսակավորել է դրանց հեղինակներին, «քանի որ ակնհայտ են այդ հրապարակումներն իրականացրած անձանց նեղ անձնական , հատվածական և խմբային շահերը, հայտնի են այդպիսի հրապարակումների հեղինակների մասնագիտական հատկանիշներն ու բարոյական կերպարը»:
Հարգելի Վահրամ Ավետիսյան, սա, մեղմ ասած, անհանդուրժող վերաբերմունք է հնչած կարծիքների վերաբերյալ: Կարծիքները պետք է հնչեն նախ, այնպես չէ որ դուք հանրային մեծ ճանաչում ունեք և հաստատ, բացի ձեր միջավայրից, հանրությանը որևէ բան ապացուցելու անհրաժեշտությունը ունեք: Դուք ավելի շատ հայտնի եք որպես Վճռաբեկ Դատարանի նախկին նախագահ Դավիթ Ավետիսյանի որդի: Օրինակ, ես համաձայն եմ հնչած կարծիքներից առնվազն մեկի հետ, որ որպես ՍԴ դատավորի թեկնածուի ձեր առաջադրման գործընթացը թափանցիկ չի եղել: Մենք չգիտենք, թե ինչպես եք դուք հայտնվել Կառավարության տեսադաշտում, և լավ կլիներ ձեր այս գրառման փոխարեն պատմեիք այդ մասին: Ինչպես դուք եք գրել, սովորենք ապրել ժողովրդավարական պետությունում: Հուսով եմ, ես ևս իմ այս կարծիքով չեմ հայտնվի հատվածական կամ խմբային շահերով առաջնորդվող անձանց շարքում»,-նշել է նա:
