Հարուցված քրեական գործի շրջանակներում ձեռնարկված միջոցառումներով՝ ոստիկանության Վարդենիսի բաժնի քրեական հետախույզները տեղեկություններ էին ստացել, որ Վարդենիսի Իսակովի փողոցի 44-ամյա մի բնակիչ ապօրինի թմրամիջոց է պահում և օգտագործում։ Հունիսի 22-ին, դատարանի որոշմամբ, քրեական հետախույզները և նախաքննական մարմնի ծառայողները, խուզարկություն կատարեցին նշված տանն ու օժանդակ շինություններում։
Այս մասին տեղեկացնում են ոստիկանությունից։
Առանձնատնից և կից շինություններից հայտնաբերվեցին ներարկիչներ, կանեփանման զանգվածներ, ծխելու համար նախատեսված ապակյա գլանակ, սպիտակ փոշենման զանգված։ Տնից ոչ հեռու իրավապահները հայտնաբերեցին նաև 420 կանեփանման ու 5.100 կակաչանման բույսեր:
Ըստ տանտիրոջ՝ հայտնաբերվածը իրենն է, աճեցրել է իր օգտագործման համար:
Կանեփանման և կակաչանման բույսերն արմատախիլ են արվել և փաթեթավորվել:
Հայտնաբերվածը առգրավվել է:
Հարուցված քրեական գործի նախաքննությունը շարունակվում է։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
