Վարչապետ Նիկոլ Փաշինյանը ֆեյսբուքյան իր էջում տարածել է տիկնոջ՝ Աննա Հակոբյանի կողմից ներկայացված տեսանյութը՝ Երևանում կատարված ողբերգական դեպքի վերաբերյալ, երբ հայրը երկու երեխաների հետ ինքնասպան էր եղել։

«Մտածելու շատ բան կա, այդ թվում՝ ինչ նկատի ունենք «նորմալ ընտանիք» ասելով: Այդ թվում՝ մենք որտե՞ղ եւ ինչպես ենք փակում՝ ոճրագործ պատուհանից նահանջի ճանապարհը: Այդ թվում՝ դեռ որքա՞ն ենք շարունակելու խոշտանգել որբացած մորը»,-նշում է վարչապետ Փաշինյանը։

Հիշեցնենք, որ 2020 թվականի մայիսի 5-ին՝ ժամը 07:30-ին, անհայտ քաղաքացուց ահազանգ է ստացվել այն մասին, որ Երևան քաղաքի Հարավ-արևմտյան Բ-2 թաղամասի 91 շենքի բակում 3 մարդ ընկած է գետնին, որոնցից 2-ը երեխաներ են:

Անմիջապես դեպքի վայր է մեկնել քննչական-օպերատիվ խումբը և շենքի բակում հայտնաբերել տղամարդու և մանկահասակ երեխաների դիեր: Պարզվել է, որ նշված շենքի բակում հայտնաբերված անձանցից մեկը նույն շենքի բնակիչ է՝ ծնված 1980թ., իսկ մանկահասակ երեխաները վերջինիս երեխաներն են:

Ձեռնարկված միջոցառումների արդյունքում փաստական տվյալներ են ձեռք բերվել այն մասին, որ տղամարդու նախկին կինը և երեխաները, տղան՝ ծնված 2013թ., իսկ աղջիկը՝ ծնված 2015թ., հյուրընկալվել են նշված հասցեում:

Քննությամբ ձեռք բերված նախնական տվյալների համաձայն՝ երեխաների հայրն է տան պատուհանից՝ շենքի 9-րդ հարկից, դուրս նետել զավակներին, ապա նաև ինքն է նետվել: