Երևանի քաղաքապետ Հայկ Մարությանը մարտի 23-ին կարգադրություն է ստորագրել, որի համաձայն «Երևանի Մհեր Մկրտչյանի անվան արտիստական թատրոն» ՀՈԱԿ-ին 2 միլիոն 981 հազար դրամ է տրամադրվել՝ Կլոդ Մանիեի «Օսկար» ներկայացման բեմադրական աշխատանքներին աջակցելու նպատակով:

Կարգադրության մեջ մասնավորապես նշվում է.

«Ղեկավարվելով «Երևան քաղաքում տեղական ինքնակառավարման մասին» օրենքի 78-րդ հոդվածի 2-րդ մասով և հիմք ընդունելով Երևանի քաղաքապետի 2020 թվականի հունվարի 14-ի հ.28-Ա որոշման 8-րդ հավելվածը (աղյուսակ 1), ինչպես նաև հաշվի առնելով Երևանի քաղաքապետի տեղակալի 11.03.2020թ. հ.02/13-21406h գրությունը՝ Երևանի Մհեր Մկրտչյանի անվան արտիստական թատրոնում Կլոդ Մանիեի «Օսկար» ներկայացման բեմադրական աշխատանքներին աջակցելու նպատակով.

1.Հանձնարարել Երևանի քաղաքապետարանի աշխատակազմի ֆինանսական վարչության պետին՝ Երևան քաղաքի 2020 թվականի բյուջեով Երևանի քաղաքապետարանի (առանց Երևանի վարչական շրջանների) մասով բյուջետային ծախսերի գործառական դասակարգման 04 բաժնի 09 խմբի 01 դասի «04. Աջակցություն համայնքային և ոչ համայնքային կազմակերպությունների ծրագրերին» ծրագրով և տնտեսագիտական դասակարգման «Նվիրատվություններ այլ շահույթ չհետապնդող կազմակերպություններին» հոդվածով նախատեսված գումարներից «Երևանի Մհեր Մկրտչյանի անվան արտիստական թատրոն» ՀՈԱԿ-ին, որպես աջակցություն, հատկացնել 2981.9 (երկու միլիոն ինը հարյուր ութսունմեկ հազար ինը հարյուր) հազար դրամ` լիազորելով կնքելու նվիրատվության պայմանագիր։

2. Սույն կարգադրության կատարման կազմակերպումն ու պատասխանատվությունը դնել Երևանի քաղաքապետարանի աշխատակազմի ֆինանսական վարչության պետի վրա։

3. Կարգադրության կատարման հսկողությունը դնել Երևանի քաղաքապետի տեղակալ Հ. Սարգսյանի վրա»։