Արտակարգ իրավիճակների նախարարությունը հանրային քննարկման է ներկայացրել Արտակարգ իրավիճակների հետևանքով ֆիզիկական և իրավաբանական անձանց պատճառված վնասի փոխհատուցման կարգը հաստատելու մասին կառավարության որոշման նախագիծը:

Նախատեսվում է հաստատել արտակարգ իրավիճակների հետևանքով ֆիզիկական և իրավաբանական անձանց պատճառված վնասի փոխհատուցման կարգը, արտակարգ իրավիճակների նախարարին որոշումն ուժի մեջ մտնելուց մեկ ամիս առաջ, վարչապետի 2012 թվականի ապրիլի 10-ի N 325-Ա որոշմամբ ստեղծված հանձնաժողովի շրջանակներում համատեղ մշակել և սահմանված կարգով  վարչապետի  հաստատմանը ներկայացնել արտակարգ դեպքերի ռիսկերի նվազեցմանն ուղղված նվազագույն և պարտադիր միջոցառումների ցանկը:

Ֆիզիկական և իրավաբանական անձանց կրած վնասի փոխհատուցման ենթակա են հետևյալ դեպքերն ու պատահարները՝

• երկրաշարժ,
• ցրտահարություն,
• ջրհեղեղ,
• ջրածածկում,
• ջրակալում,
• կարկուտ,
• հորդառատ անձրև,
• սելավ,
• քամի, փոթորիկ, պտտահողմ,
• ամպրոպ,
• սողանք,
• երաշտ,
• վտանգավոր բեռների տեղափոխմամբ պայմանավորված պատահարներ,
• համաճարակ, էպիզոտիա,
• ճառագայթային (միջուկային), քիմիական վթարներ,
• հրդեհ,
• պայթյուն,
• փլուզումներ,
• քարաթափումներ:

Ընտանիքների անապահովության գնահատման համակարգում հաշվառված սոցիալապես անապահով ընտանիքներին վնասի փոխհատուցում կտրվի վնասի  100 %-ի չափով:

Ապահովագրված տնտեսական գործունեություն չիրականացնող ֆիզիկական անձանց պատճառված վնասը կփոխհատուցվի ապահովագրական ընկերության կողմից չհատուցված գումարի չափով մինչև վնասի 100 %-ը։

Չապահովագրված տնտեսական գործունեություն չիրականացնող ֆիզիկական անձանց պատճառված վնասը կփոխհատուցվի մինչև պատճառված վնասի 80 %-ը։

Ապահովագրված իրավաբանական անձի կարգավիճակ ունեցող ոչ առևտրային կազմակերպությանը կփոխհատուցի ապահովագրական ընկերության կողմից չհատուցված գումարի չափով մինչև վնասի 100 %-ը:

Չապահովագրված իրավաբանական անձի կարգավիճակ ունեցող ոչ առևտրային կազմակերպությանը կփոխհատուցի մինչև պատճառված վնասի 60 %-ը, բացառությամբ հանրակրթական և սոցիալական նշանակության կազմակերպությունների, որոնց փոխհատուցվում է պատճառած վնասի 100%-ը։

Կառավարության կողմից վնասի փոխհատուցման ձևեր կլինեն՝

• վարկի տոկոսի սուբսիդավորում,
• գույքահարկի, հողի հարկի մասնակի փոխհատուցում, ջրի, էլեկտրաէներգիայի և գազի սակագների սուբսիդավորում,
• ապահովագրավճարի սուբսիդավորում,
• պատճառված վնասի չափի դրամական փոխհատուցում,
• վնասի փոխհատուցում բնեղենով,
• առողջությանը և կյանքին հասցված վնասի փոխհատուցում: