Վարչապետ Նիկոլ Փաշինյանի մարտի 29-ի որոշմամբ սահմանվում է, որ ընտանիքում բռնության ենթարկված անձին ֆինանսական աջակցություն  տրամադրվում է ոչ ավելի, քան 150 հազար դրամի չափով, հետևյալ նպատակներով՝ 

• կենսաապահովման նվազագույն կարիքները  հոգալու համար.
• բուժումը կամ առողջության վերականգնումը կազմակերպելու նպատակով փոխհատուցման կամ մասնակի փոխհատուցման համար. 
• ժամանակավոր կացարանով ապահովելու նպատակով բնակելի տարածքի վարձակալության գումարի փոխհատուցման համար.
• աշխատանքի տեղավորման նպատակով վերապատրաստման դասընթացների վարձավճարի փոխհատուցման համար՝ բացառությամբ «Զբաղվածության մասին» Հայաստանի Հանրապետության օրենքով գործազուրկների և աշխատաշուկայում անմրցունակ անձանց համար սահմանված զբաղվածության կարգավորման պետական ծրագրերում նախատեսված դասընթացների:

Ընտանիքում բռնության ենթարկված անձին ֆինանսական աջակցություն տրամադրվում է կառավարության 2019 թվականի մարտի 29-ի որոշման հավելվածի հարցաթերթում պատասխանների ամփոփման արդյունքում՝

1) 50 հազար դրամի չափով՝ 8-22 միավորի դեպքում,

2) 100 հազար դրամի չափով՝ 23-36 միավորի դեպքում,

3) 150 հազար դրամի չափով՝ 36-ից ավելի միավորի դեպքում:

Ընտանիքում բռնության ենթարկված անձին ժամանակավոր ֆինանսական աջակցություն չի տրամադրվում, եթե միավորների քանակը չի գերազանցում 8 միավորը: 

Որոշման համաձայն, ընտանիքում բռնության ենթարկվածներին ֆինանսական աջակցություն տրամադրվում է ընտանիքում բռնության ենթարկված անձի կամ նրա օրինական ներկայացուցչի կամ խնամակալության և հոգաբարձության մարմնի դիմումի հիման վրա: