Պետական եկամուտների կոմիտեն հանրային քննարկման է ներկայացրել ««Հարկային ծառայության մասին» ՀՀ օրենքում փոփոխություն և լրացում կատարելու մասին» օրենքի նախագիծը:
նախագծի հիմնավորման մեջ նշվում է, որ ներկայումս ՀՀ պետական եկամուտների կոմիտեի համակարգում գործում են ինչպես մաքսային, այնպես էլ՝ հարկային ծառայություններ: Հարկային և մաքսային ծառայությունները, գործելով միևնույն գերատեսչության կազմում, ունեն համահավասար կարգավիճակ: Սակայն նշված ծառայությունների վերաբերյալ գործող «Հարկային ծառայության մասին» և «Մաքսային ծառայության մասին» ՀՀ օրենքներով միևնույն պաշտոնների համար նախատեսված են տարբեր իրավակարգավորումներ և միևնույն պաշտոնների համար սահմանվում են տարբեր իրավական կարգավիճակներ: Մասնավորապես, «Հարկային ծառայության մասին» ՀՀ օրենքի 15-րդ հոդվածի 1-ին մասի համաձայն` հարկային մարմնի հատկապես կարևորագույն գործերով քննիչի և հարկային մարմնի ավագ քննիչի պաշտոնները դասակարգվում են հարկային ծառայության առաջատար պաշտոնների խմբում, մինչդեռ «Մաքսային ծառայության մասին» ՀՀ օրենքի 7-րդ հոդվածի 2-րդ մասի 2-րդ կետով` կոմիտեի հատկապես կարևորագույն գործերով քննիչի և կոմիտեի ավագ քննիչի պաշտոնները դասակարգվում են մաքսային ծառայության գլխավոր պաշտոնների խմբում:
Միևնույն իրավական կարգավիճակ ունեցող պաշտոնատար անձանց մասով նշված իրավական անհամաչափությունը շտկելու նպատակով՝ առաջարկվող օրենսդրական փոփոխությամբ` հարկային մարմնի հատկապես կարևորագույն գործերով քննիչի և հարկային մարմնի ավագ քննիչի պաշտոնները հարկային ծառայության առաջատար պաշտոններից փոփոխվել են հարկային ծառայության գլխավոր պաշտոնների: Այդպիսով, կպահպանվի իրավական որոշակիությունը միևնույն ստորաբաժանման` ՀՀ ՊԵԿ քննչական վարչության կազմում գործող միևնույն պաշտոնների համար և նշված պաշտոնները զբաղեցնող անձանց իրավական կարգավիճակի մեջ չեն լինի տարբերություններ:
Հաշվի առնելով «Նորմատիվ իրավական ակտերի մասին» ՀՀ օրենքի 34-րդ հոդվածի 2-րդ մասը, այն է՝ նորմատիվ իրավական ակտում փոփոխություն կամ լրացում կարող է կատարվել միայն նույն տեսակի և բնույթի նորմատիվ իրավական ակտով, մշակվել է սույն օրենքի նախագիծը:
Այս նախագիծը նպատակ է հետապնդում միևնույն իրավական կարգավիճակ ունեցող պաշտոնատար անձանց մասով իրավական անհամաչափությունը շտկելու, որի արդյունքում կպահպանվի իրավական որոշակիությունը միևնույն ստորաբաժանման` ՀՀ ՊԵԿ քննչական վարչության կազմում գործող միևնույն պաշտոնների համար և նշված պաշտոնները զբաղեցնող անձանց իրավական կարգավիճակի մեջ չեն լինի տարբերություններ:
