Ինչպես արդեն տեղեկացրել էինք, ՀՀ վարչապետ Նիկոլ Փաշինյանը մարտի 25-ին որոշում է ստորագրել, որի համաձայն Լևոն Հակոբյանը նշանակվել է առողջապահության նախարարի տեղակալ:
Իրավաբան.net-ը ձեզ է ներկայացնում նրա կենսագրությունը:
Լևոն Հակոբյանը ծնվել է 1986 թվականի օգոստոս 30-ին, Երևանում:
2002–2008 թվականներին սովորել է Երևանի Մխիթար Հերացու անվան պետական բժշկական համալսարանի ընդհանուր բժշկության ֆակուլտետում: 2010-ին ավարտել է Ավդալբեկյանի անվան առողջապահության ազգային ինստիտուտի կլինիկական օրդինատուրան՝ սոցիալական հիգիենա և առողջապահության կազմակերպում մասնագիտությամբ: 2012–2014 թվականներին ուսանել է ՀՀ պետական կառավարման ակադեմիայի մագիստրատուրայում` հանրային կառավարում մասնագիտությամբ:
Աշխատանքային գործունեությունը սկսել է Երևանի քաղաքապետարանի աշխատակազմի առողջապահության վարչությունում` զբաղեցնելով տարբեր պաշտոններ (2010-2013):
2013-2014 թվականներին եղել է Թիվ 5 պոլիկլինիկայի տնօրենի ժամանակավոր պաշտոնակատար:
Այնուհետև` 2015–2016 թվականներին կրկին աշխատել է Երևանի քաղաքապետարանի աշխատակազմի առողջապահության վարչությունում, որտեղ համակարգել է մոր և մանկան առողջության պահպանման ծառայության, առողջության առաջնային օղակի աշխատանքը:
2016 թվականին նշանակվել է «Տաշիր Ինվեստ Գրուպ» ՓԲԸ-ի տնօրեն: Նույն տարում զորակոչվել է ՀՀ զինված ուժեր, ծառայել է մինչև 2018 թվականը:
2019 –ին կրկին աշխատել է «Տաշիր Ինվեստ Գրուպ»-ում` որպես տնօրեն:
Լևոն Հակոբյանը ութ տպագիր հոդվածի հեղինակ է: «Երևանի քաղաքապետարանի ենթակայության առողջության առաջնային պահպանման բուժհաստատությունների կառավարման համակարգում բարեփոխումների իրականացման հիմնավորումը» թեմայով թեկնածուական ատենախոսության նախնական փորձաքննությունը տեղի է ունեցել ՀՀ ԱՆ ԱԱԻ գիտական խորհրդի նիստում (դեկտեմբեր 2018): Աշխատանքը երաշխավորվել է հրապարակային պաշտպանության:
Ամուսնացած է, ունի 3 դուստր:
