Վաղը՝ հունիսի 21-ին կառավարությունը որոշումներ կընդունի վերանվանել «Արմավիրի մտավոր թերզարգացում ունեցող երեխաների N 15 հատուկ (օժանդակ) դպրոց» և «Վաղարշապատի մտավոր թերզարգացում ունեցող երեխաների N 2 հատուկ (օժանդակ) դպրոց» պետական ոչ առևտրային կազմակերպությունները։
Հարցերը գործադիրի անդամներին կներկայացնի կրթության և գիտության նախարար Արայիկ Հարությունյանը։
Նախագծերի համաձայն ՊՈԱԿ-ները համապատասխանաբար կկոչվեն «Արմավիրի տարածքային մանկավարժահոգեբանական աջակցության կենտրոն» և «Վաղարշապատի տարածքային մանկավարժահո-գեբանական աջակցության կենտրոն»։
Որոշման հիմնավորման համաձայն, ՀՀ Ազգային ժողովի կողմից 2014 թվականի դեկտեմբերի 1-ին ընդունվել է «Հանրակրթության մասին» ՀՀ օրենքում լրացումներ և փոփոխություններ կատարելու մասին» ՀՀ օրենքը (ՀՕ-200-Ն), որով նախատեսվում է հանրակրթության համակարգում անցում կատարել համընդհանուր ներառական կրթության, կիրառելով երեխայի կրթական կարիքներին արձագանքման եռաստիճան համակարգ: Օրենքի կիրարկման արդյունքում կրթության առանձնահատուկ պայմանների կարիք ունեցող երեխաները մանկավարժահոգե-բանական աջակցություն կստանան 3 մակարդակում՝ հանրակրթական դպրոցում, ինչպես նաև տարածքային և հանրապետական մանկավարժահոգեբանական աջակցության կենտրոնների կողմից:
Օրենքով ամրագրվել է, որ հատուկ դպրոցները, պետք է վերակազմակերպվեն տարածքային մանկավարժահոգեբանական աջակցության կենտրոնների, որոնք աջակցություն կտրամադրեն հանրակրթական դպրոցներին, կազմակերպելու համար կրթության առանձնահատուկ պայմանների կարիք ունեցող երեխաների կրթությունը:
Տարածքային մանկավարժահոգեբանական աջակցության կենտրոնները, որպես երկրորդ մակարդակ, պետք է մատուցեն անձի կրթության աջակցության մանկավարժահոգեբանական ծառայություններ (կազմակերպում, համակարգում) և իրականացնեն անձի կրթության առանձնահատուկ պայմանների կարիքի գնահատում:
Հայաստանի Հանրապետության կառավարության 2018 թվականի հունվարի 11-ի N 275-Ն որոշման N 1 հավելվածով հաստատված ՀՀ կառավարության 2018 թվականի գործունեության ծրագրի միջոցառումների ցանկի 72-րդ կետի համաձայն նախատեսվում է 2018 թվականի ընթացքում Արմավիրի մարզում 2 տարածքային մանկավարժահոգեբանական աջակցության կենտրոնների հիմնադրում: «Արմավիրի տարածքային մանկավարժահոգե-բանական աջակցության կենտրոն» և «Վաղարշապատի տարածքային մանկավարժահոգե-բանական աջակցության կենտրոն» պետական ոչ առևտրային կազմակերպությունները հիմնադրվում են Արմավիրի մտավոր թերզարգացում ունեցող երեխաների N 15 և Վաղարշապատի մտավոր թերզարգացում ունեցող երեխաների ՆՈ.2 հատուկ (օժանդակ) դպրոցները վերանվանելու միջոցով: Արմավիրի և Վաղարշապատի հատուկ դպրոցներից սովորողների տեղափոխում հանրակրթական դպրոցներ, իսկ ներառական կրթական համակարգում չներառված երեխաների հետագա կրթությունը ապահովվելու է ՀՀ տարածքում գործող հատուկ դպրոցներում (ծնողի ընտրությամբ):
