Քիչ առաջ Իրավաբան․net-ը զրուցեց ոստիկանության Էրեբունու ՊՊԾ գունդը գրաված զինված խմբի անդամներից Վարուժան Ավետիսյանի հետ։

-Պարոն Ավետիսյան, այս պահին ի՞նչ իրավիճակ է ձեզ մոտ։

-Ներսում շատ ուրախ և ոգևորված վիճակ է։ Ժողովուրդը գալիս է այստեղ, մոտեցել է ոստիկանական արգելապատնեշներին, որոնք երկու կողմից են։ Ժողովրդի ձայնը լսում ենք և որպես պատասխան հրավառություն արեցինք, որ տեսնեն, այսինքն՝ ողջունեցինք նրանց։

-Հրապարակում է եղել, թե մինչև օրվա ավարտին բոլոր պատանդներին ազատ եք արձակելու, ճի՞շտ է։

-Նման ինֆորմացիա չունենք։ Այս առումով մենք բավականին կառուցողական բանակցում ենք և մեր կամքով բաց ենք թողնում։

-Իսկ ի՞նչ որ բան նախատեսվում է առաջիկա ժամերին։

-Մենք աչալուրջ վերահսկում ենք իրավիճակը, մենք որևէ բան չենք նախատեսում, միայն թե ոստիկանությունը չգրոհի։

-Իսկ պարոն Օսիպյանն ու պարոն Եղիազարյանն ինչպե՞ս են զգում իրենց։

-Նրանք գնացին քնելու։

-Այսինքն, քնելու պայմաններ էլ կան։

-Նույն պայմաններում են, ինչ մենք։

-Կար տեղեկություն, որ որոշակի լարվածություն է նկատվել։

-Ոստիկանությունը զրահատեխնիկա շարժեց, սակայն այդ շարժը դադարեց։ Հիմա մենք շատ ավելի աչալուրջ ենք։ Մենք ուզում ենք, որ ամեն ինչ խաղաղ ավարտվի։ Ոստիկանությունն է հայտարարում, թե կգրոհեն, կչեզոքացնեն։ Մենք ասում ենք, որ պաշտպանվելու ենք մինչև վերջ։

Իրավաբան․net