Ըստ աղբյուրի՝ Ռուսաստանի Դաշնության Հարավարևմտյան պետական համալսարանի նախաձեռնությամբ անցկացվող ուսանողների, մագիստրանտների և ասպիրանտների 5-րդ միջազգային բաց մրցույթին մասնակցել է ԵՊՀ իրավագիտության ֆակուլտետի մագիրստրանտ Առնոլդ Վարդանյանը:
Միջազգային բաց մրցույթը կազմակերպվել էր Փաստաբանների դաշնային պալատի, Կուրսկի շրջանի փաստաբանական պալատի, Մոսկվայի ակադեմիկոս Օ. Կուտաֆինի անվան իրավաբանական պետական ակադեմիայի փաստաբանական ինստիտուտի, «Յուրիստ» հրատարակչական խմբի անմիջական աջակցությամբ:
Հարավարևմտյան պետական համալսարանի քրեական դատավարության և կրիմինալիստիկայի ամբիոնի հիմնադրման 20-ամյակին նվիրված մրցույթի նպատակն էր ուսանողների և երիտասարդ գիտնականների մոտ զարգացնել ստեղծագործական և գիտական մտքի աշխատանքը, ինչպես նաև գիտահետազոտական աշխատանք կատարելու հմտությունները:
Մրցույթին, բացի ռուսատանյան բուհերից, մասնակցել են նաև Բելառուսի, Ուկրաինայի, Հայաստանի և Ղազախստանի՝ իրավագիտության ոլորտն ուսումնասիրող ուսանողները, մագիստրանտներն ու ասպիրանտները:
Դեկտեմբերի 15-ին մրցույթի հանձնաժողովը՝ Կուրսկի շրջանի փաստաբանական պալատի նախագահ Ա. Դերենկովի գլխավորությամբ, քննարկել է մրցույթին ներկայացված աշխատանքները և հրապարակել լավագույն աշխատանքների հեղինակների անունները, որոնց շարքում է եղել նաև Մայր բուհի մագիստրանտը:
