ՀՀ քննչական կոմիտեի Երևան քաղաքի քննչական վարչությունում հարուցվել է քրեական գործ՝ մահվան պատճառ հանդիսացած ավտովթարի դեպքի առթիվ:
ՔԿ-ի հաղորդագրության մեջ նշվում է, որ Նախնական տվյալներով՝ 2015 թվականի դեկտեմբերի 8-ին՝ ժամը 23:15-ի սահմաններում, Երևանի «Լամբադա» կամրջի վրա բախվել են «ՎԱԶ 21074» և «Մերսեդես-Բենց» մակնիշի ավտոմեքենաները, որի հետևանքով «ՎԱԶ 21074» մակնիշի ավտոմեքենայի ուղևոր Լ.Սարգսյանը տեղում մահացել է, իսկ նույն մեքենայի ուղևոր Ն.Ավչյանը և «Մերսեդես-Բենց» մակնիշի ավտոմեքենայի ուղևոր Է.Ղազարյանը ստացած մարմնական վնասվածքներով տեղափոխվել են հիվանդանոց:
Դեպքի առթիվ ՀՀ քննչական կոմիտեի Երևան քաղաքի քննչական վարչությունում հարուցվել է քրեական գործ՝ 242-րդ հոդվածի 2-րդ մասի հատկանիշներով (Ճանապարհային երթևեկության կամ տրանսպորտային միջոցների շահագործման կանոնները խախտելը, ինչն անզգուշությամբ առաջացրել է մարդու մահ):
Քրեական գործով նշանակվել են դատաբժշկական, դատահետքաբանական-դատաքիմիական համալիր, ինչպես նաև` ավտոմեքենաների տեխնիկական սարքինության վերաբերյալ դատաավտոտեխնիկական փորձաքննություններ:
Կատարվում է նախաքննություն:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցվածչէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
