«Նաիրիտ» գործարանի դեմ դատական գործ հարուցած աշխատակիցները նորից ստիպված են սպասել իրենց հասանելիք գումարները ստանալուն: Այս մասին Իրավաբան.net-ին հայտնեց Հայկանուշ Թութունջյանը, ով ևս դատարան էր դիմել աշխատավարձի գումարի և տոկոսների բռնագանձման պահանջով: Դատարանը բավարարել էր հայցվորի պահանջը և վճիռն ուղարկվել էր ԴԱՀԿ:
«Գնացի ԴԱՀԿ ծառայություն, այնտեղից ինձ նորից ուղարկեցին դատարան`ասելով, որ վճռի արգելակման պահանջ պետք է լինի, քանի որ հիմա գումարն ու տոկոսները չեն կարող տալ»,- ասաց Հ. Թութունջյանը:
Այնտեղից հրաժարվել են վերադարձնել կնոջ աշխատավարձն ու տոկոսները` պատճառաբանելով, որ «Գազպրոմ Արմենիա»-ն Նաիրիտին դատի է տվել՝ սնանկ ճանաչելու պահանջով, և մինչև դատական գործը չավարտվի, գումար չեն կարող վերադարձնել:
«Նաիրիտ»-ում Հայականուշ Թութունջյանին կրկին առաջարկել են ստորագրել պայմանագիրը, որով նա կկարողանա հետ ստանալ միայն աշխատավարձի մայր գումարը` առանց տոկոսների, սակայն քաղաքացին հրաժարվել է:
Հիշեցնենք, որ Հայկանուշ Թութունջյանը չէր ստորագրել մայր գումարը ստանալու պայմանագիրը և շարունակել է դատական կարգով պահանջել թե՛ աշխատավարձը, թե՛ իրեն հասանելիք տոկոսները: Արդյունքում դատարանը կայացրել էր դատական ակտ, որով բավարարարել էր ինչպես հիմնական աշխատավարձի, այնպես էլ տոկոսագումարների բռնագանձման պահանջը: Մայր գումարը կազմում է 1 մլն դրամ, իսկ տոկոսագումարները՝ 560 հազար դրամ:
Լաուրա Մամյան
