«Աքիլես» ավտովարորդների իրավունքների պաշտպանության կենտրոն հաճախ են դիմում վարորդներ, ովքեր պնդում են, թե տեսուչի կազմած արձանագրությունը՝ իրենց կողմից սահմանված արագությունը խախտելու առնչությամբ, իրականությանը չի համապատասխանում: Մեզ հետ զրույցում ասաց ՀԿ-ի նախագահ Էդուարդ Հովհաննիսյանը, նա հավելեց. «Եթե տեսուչն արագություն է ֆիքսել, նա նշում է, որ էկրանի վրա կա, վարորդը տեսնում է, որ վերագրված արագությունից ավելի շատ է արձանագրված, բայց այստեղ մի խնդիր է առկա»:

Իսկ այդ խնդիրը, ըստ մեր զրուցակցի, կապված է ՃՈ տեսուչի գործողությունների հետ, նա նշում է, որ հաճախ տեսուչները սխալ կերպով է արձանագրում ենթադրյալ խախտումը. «Նման դեպքեր մենք շատ ենք ունեցել: Կարելի է միջամտության միջոցով՝ արագաչափերի միացումներով ստանալ այն արագությունը, որ իրականից ավելի բարձր է: Կա այլ հանգամանք, որ արագությունը սահմանափակող նշանները տեսանելի չեն»,- նշեց մեր զրուցակիցը:

Բացի այդ, ըստ նրա՝ հաճախ վարորդները պարզապես չեն իմանում, որ բնակավայրերում 60 կմ/ժ է արագությունը. «Իսկ բնակավայրերից դուրս 90 կմ/ժ է, և եթե բնակավայրերից ինչ-որ տեղ սահմանափակում են անում՝ 40, 50 կմ/ժ-ով, ապա այդ նշանը պետք է վարորդին տեսանելի լինի: Եթե անհրաժեշտություն կա, ապա հարկավոր է կրկնել վարորդը»:

ՀԿ նախագահը նաև վստահեցրեց, որ ՃՈ տեսուչների արձանագրած խախտումների մասով իրենք հաղթած գործեր ունեն. «Բայց տեսուչները շարունակում են մանիպուլյացիոն միջոցները կիրառել առ այսօր»,- եզրափակեց նա:

Գ.Թ.

Իրավաբան.net