Ազգային ժողովը երկրորդ ընթերցմամբ և ամբողջությամբ ընդունել է «ՀՀ ընտանեկան օրենսգրքում փոփոխություններ և լրացումներ կատարելու մասին», «Երեխայի իրավունքների և երեխայի պաշտպանության համակարգի մասին» օրենքների փաթեթը։ Iravaban.net-ը տեղեկանում է ԱՍՀՆ-ից։
Աշխատանքի և սոցիալական հարցերի նախարարության կողմից ՄԱԿ-ի մանկական հիմնադրամի աջակցությամբ մշակված փաթեթը կարևոր քայլ է երեխայակենտրոն պետական համակարգի ձևավորման ուղղությամբ, որտեղ յուրաքանչյուր որոշման հիմքում երեխայի լավագույն շահն է։
Ըստ այդմ ՝
- ամրապնդվել է պետության դերը՝ որպես երեխայի իրավունքների ապահովման հիմնական պատասխանատու,
- հստակեցվել է համայնքի դերը՝ ներդնելով մասնագիտացված սոցիալական աշխատողի ինստիտուտ,
- ձևավորվել է մոնիթորինգի և վերահսկողության նոր համակարգ՝ կանխարգելման և արագ արձագանքի համար,
- հստակեցվել են մարզպետարանների և Երևանի քաղաքապետարանի լիազորությունները երեխայի պաշտպանության ոլորտում,
- սահմանվել է «բուլինգ» հասկացությունը և դրա կանխարգելման ու արձագանքման մեխանիզմները,
- ամրագրվել է, որ յուրաքանչյուր երեխայի այլընտրանքային խնամքի ձևը պարբերաբար վերանայվում է՝ հաշվի առնելով նրա կարծիքն ու շահերը,
- հանվել է տարիքային սահմանափակումը երեխայի կարծիքը հաշվի առնելու համար,
- ներդրվելու է նոր տեղեկատվական համակարգ՝ դեպքերի վարման, ծառայությունների պլանավորման և հաշվետվողականության ապահովման համար։
Փաթեթը հնարավորություն կտա ամրապնդել համայնքային և պետական համակարգերի համագործակցությունը՝ երեխայի պաշտպանությանն ուղղված միասնական մոտեցմամբ։
