Ավելի վաղ լրատվամիջոցներում տեղեկություն էր տարածվել, որ Թուրքիայի քաղաքացին Երևանի «Լոնդոն» հյուրանոցում հայհոյել և անհարգալից պահվածք է դրսևորել հյուրերի և հյուրանոցի աշխատակիցների նկատմամբ։
Գևորգ Բարսեղյանը գրառում է արել և հայտնել, որ հյուրանոցը պատկանում է իրենց, և ահազանգողը ինքն է եղել։
«Այո, դեպքը տեղի է ունեցել մեզ պատկանող հյուրանոցում, ահազանգ տվողը ես եմ եղել։
Թուրքիայի քաղաքացին սենյակ էր ամրագրել ու ժամանել «Լոնդոն» հյուրանոց։ Կեցության երկրորդ գիշերը ալկոհոլի ազդեցության տակ վիրավորական արտահայտություններ է ուղղել մեր աշխատակցի հասցեին։ Ես, այդ մասին տեղեկանալով աշխատակցից, ահազանգել են ոստիկանություն, որպեսզի խուլիգանին սանձեն։ Ոստիկանները նրան բերման են ենթարկել և 3 օր պահել ձերբակալվածների պահման վայրում։ Վերջում էլ նա մեղայական հայացքով ներողություն է խնդրել ինձնից ու աշխատակազմից։ Կարծում եմ՝ հաջորդ անգամ կամ կշրջանցի Հայաստանը, կամ տասնապատիկ զսպվածություն կցուցաբերի հայերի հետ շփումներում։
Ինձ համար արժանապատվության հարց է, երբ հատկապես Թուրքիայի քաղաքացին վիրավորում է իմ թիմակցին։ Ամեն ինչ ճիշտ եմ արել, արդյունքներից բավարարված եմ»,-գրառել է նա։
Ընտրված լուսանկարը նյութի հետ առնչություն չունի։
