Բարձրագույն դատական խորհուրդը նոյեմբերի 11-ին որոշում է ընդունել, որով Երևան քաղաքի առաջին ատյանի ընդհանուր իրավասության քրեական դատարանի դատավոր Գարիկ Աբելյանը գործուղվել է Սյունիքի մարզի առաջին ատյանի ընդհանուր իրավասության դատարան։

Նշենք, որ Գարիկ Աբելյանը Երևան քաղաքի առաջին ատյանի ընդհանուր իրավասության քրեական դատարանում նշանակվել էր նոյեմբերի 8-ին, նախագահի հրամանագրով։

ԲԴԽ-ի որոշման մեջ ասվում է․

«Հիմք ընդունելով Սյունիքի մարզի առաջին ատյանի ընդհանուր իրավասության դատարանի նախագահի պաշտոնակատարի գրությունը, Երևան քաղաքի առաջին ատյանի ընդհանուր իրավասության քրեական դատարանի դատավոր Գարիկ Աբելյանի համաձայնությունը, Սյունիքի մարզի առաջին ատյանի ընդհանուր իրավասության դատարանում ողջամիտ ժամկետներում գործերի քննությունն իրականացնելու անհրաժեշտությունը և ղեկավարվելով «Հայաստանի Հանրապետության դատական օրենսգիրք» սահմանադրական օրենքի 56-րդ հոդվածի 5-րդ մասով, 94-րդ հոդվածի 1-ին մասով` Բարձրագույն դատական խորհուրդը որոշում է՝

1. Երևան քաղաքի առաջին ատյանի ընդհանուր իրավասության քրեական դատարանի դատավոր Գարիկ Աբելյանին 2024 թվականի նոյեմբերի 11-ից մինչև 2025 թվականի փետրվարի 11-ը ներառյալ գործուղել Սյունիքի մարզի առաջին ատյանի ընդհանուր իրավասության դատարան՝ շարունակելով քննել Սյունիքի մարզի առաջին ատյանի ընդհանուր իրավասության դատարանի դատավորի կարգավիճակում իր վարույթում գտնված գործերը:

 2. Սույն որոշումն ուժի մեջ է մտնում հրապարակման պահից»: