ՌԴ նախագահի մամուլի քարտուղար Դմիտրի Պեսկովն ասել է, որ ղարաբաղյան իրավիճակի կարգավորման այլ իրավական հիմքեր չկան, բացառությամբ Ռուսաստանի, Հայաստանի և Ադրբեջանի միջև եռակողմ պայմանավորվածությունների։ Այս մասին գրում է РИА Новости-ն։
«Երկու երկրների միջև առկա խնդիրների լուծումը և տարածաշրջանում լարվածության թուլացմանն ուղղված որոշ համատեղ գործողությունների ու քայլերի հնարավոր մշակումն առաջին հերթին հնարավոր է այն եռակողմ փաստաթղթերի հիման վրա, որոնք ստորագրվել են Ռուսաստանի հետ։ Առայժմ այլ իրավական հիմքեր չկան, որոնք կնպաստեն կարգավորմանը»,- ասել է Պեսկովը։
Նա նշել է, որ իրենք ողջունում են ցանկաղած քայլ, որը կարող է օգնել Հայաստանի և Ադրբեջանի միջև իրավիճակի կարգավորմանը։
«Բայց մենք նաև գիտենք, որ կան տարբեր փորձեր, որոնք լղոզում են կարգավորման հիմքերը, որոնք երկարաժամկետ հեռանկարում կարող են արդյունք չտալ»,-ասել է նա։
Նշենք, որ Վաշինգտոնում կայացել է Միրզոյան-Բլինքեն-Բայրամով հանդիպումը: ԱԳՆ-ից հայտնել են, որ քննարկվել են տարածաշրջանում կայունությանն ու անվտանգությանն առնչվող հարցեր, Հայաստանի և Ադրբեջանի միջև հարաբերությունների կարգավորման գործընթացը:
