Ազգային ժողովի «Պատիվ ունեմ» խմբակցության պատգամավոր Թագուհի Թովմասյանը ֆեյսբուքյան իր էջում գրել է.

«Հաշվի առնելով

1. Մարդու իրավունքների պաշտպանության համակարգում կյանքի իրավունքի կարևորությունը, առանց որի երաշխավորման անիմաստ է խոսել մարդու այլ իրավունքների արդյունավետ պաշտպանության մասին,

2. Մամուլում հրապարակված տեղեկությունները, որ Ապարանում 3 անձի սպանության և 4 անձի վիրավորվելու պատճառները կարող են լինել քաղաքական տարաձայնությունները,

3. Այն, որ կրկին ըստ մամուլի հաղորդագրությունների՝ հանցագործությունը կատարվել է ինքնաձիգի միջոցով, որը հաստատվելու դեպքում լուրջ հարցեր է առաջացնում ապօրինի զենքի շրջանառության հիմնախնդիրների և անձանց կյանքի ու առողջության դեմ ուղղված հանցագործությունների դեմ պայքարի համատեքստում,

Որպես ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ` հետևողական եմ լինելու այս սահմռկեցուցիչ հանցագործության քննության ընթացքին և կոչ եմ անում պատկան մարմիններին իրականացնել գործի բազմակողմանի և օբյեկտիվ քննություն՝ քրեադատավարական կանոնների խիստ պահպանմամբ, որի արդյունքում ոչ միայն կպատժվեն բոլոր մեղավորները, այլև իրենց պատասխանները կստանան հասարակության մոտ առկա գործի քաղաքական ենթատեքստին վերաբերող բոլոր հարցերը»,- գրել է նա:

Ավելի վաղ քննչական կոմիտեն հայտարարություն էր տարածել, որում նշվում է.

«2022թ. հունիսի 18-ին՝ ժամը 22:30-ի սահմաններում, Երևան քաղաքի 32–ամյա բնակիչը եղբոր հետ Ապարան քաղաքում ավտոմեքենան վարելու ընթացքում ձայնային ազդանշան է տվել «Ինֆինիտի» մակնիշի ավտոմեքենային, շրջանցել և կանգնեցրել այն, այնուհետև մոտեցել են վարորդին և մեքենան վարելու հարցի շուրջ զրուցել նրա հետ, ինչին միջամտել են Ապարան քաղաքի մի խումբ բնակիչներ: Խոսակցությունը վերածվել է վիճաբանության, որը շարունակվել է Ապարան քաղաքի սկզբնամասում: Նշված խոսակցությունը շարունակելու նպատակով հաջորդ օրը՝ հունիսի 19-ին, 32-ամյա տղամարդը, նրա եղբայրը մի քանի անձանց հետ գնացել են Ապարան քաղաքում գտնվող գազալցակայանի տարածք, հանդիպել են նախորդ օրը իրենց խոսակցությանը միջամտած անձանցից մեկին և ծեծի ենթարկել վերջինիս: Նույն հարցի շուրջ խոսակցությունը ժամը 19:30-ի սահմաններում շարունակվել է Նիգավան գյուղի աղբանոցին հարակից տարածքում, որի ընթացքում 32-ամյա տղամարդն իր մոտ գտնվող հրացանից կրակոցներ է արձակել իրենց հետ վիճաբանող անձանց ուղղությամբ: Արդյունքում, հրազենային վնասվածքներով Ապարանի բժշկական կենտրոն տեղափոխված երկու անձ՝ Ապարան քաղաքի 27-ամյա բնակիչներ, հիվանդանոցում մահացել են, իսկ 5 անձ տեղափոխվել են բժշկական կենտրոններ:

32-ամյա տղամարդը ձերբակալվել է»: