Հանրապետության Հրապարակում ընթացող ամփոփիչ հանրահավաքի ժամանակ ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանն ասաց․
«Հիշեցնեմ ձեզ, երբ դատարանի առջև հավաքվում էին իմ աջակիցները, ասում էին, որ պիցցայակերներ են, եկել են պիցցա ուտելու համար։ Հիմա չեմ կարծում, որ Հայաստանում և ընդհանրապես, Հարավային Կովկասում բավարար պիցցա կա՝ այսքան մարդու կերակրելու համար։
Քարոզարշավի վերջին օրն է այսօր, իմ գործընկերներն արդեն ասացին, որ եղել ենք ՀՀ բոլոր մարզերում, բոլոր քաղաքներում, բազմաթիվ գյուղերում։
Հիմա շատ ավելի լավ գիտենք, թե ոնց եք դուք ապրում, ինչի կարիք ունեք, ինչ խնդիրներ են կանգնա մեր երկրի առջև։ Շնորհակալ եմ բոլորին, ովքեր հանդիպել են մեզ հետ, օգնել են հասկանալ՝ ինչ է կատարվում և ոգևորել են մեզ այս պայքարի ընթացքում։
Շնորհակալություն ձեզ։ Բայց մեկ կարևոր արձանագրում՝ մենք սկսել ենք քարոզարշավը, բայց ավարտում ենք հաղթարշավով։ Նաև մեկ բան ենք հասկացել, որ սա պայքար չի իշխանության համար։ Սա պայքար է պետականությունը մեր ժողովրդին վերադարձնելու համար»։
