Ոստիկանության տարբեր ստորաբաժանումների ծառայողների բացատրական աշխատանքի արդյունքում օրերս արձանագրվել են ապօրինի հրազենների կամավոր հանձնման դեպքեր։ Երևանում բնակվող 26-ամյա մի երիտասարդ Մալաթիայի բաժնում կամավոր հանձել է գործարանային համարով «Կալաշնիկովի» ինքնաձիգ, որն, ըստ նրա՝ բերել էր անցած տարի Արցախից։
Այս մասին տեղեկանում ենք ոստիկանությունից:
Բացատրական աշխատանքն իրականացրել են Քրեական ոստիկանության գլխավոր վարչության ծառայողները։ Մաշտոցի բաժնի Դավիթաշենի բաժանմունքի քրեական հետախույզների բացատրական աշխատանքի շնորհիվ ևս արձանագրվել է Արցախից բերված գործարանային համարով «Կալաշնիկովի» կամավոր հանձնման դեպք։ Ինքնաձիգը բաժանմունք է բերել Երևանում բնակվող 44-ամյա մի տղամարդ։
Արդյունավետ էր նաև Վաղարշապատի բաժնի համայնքային ոստիկանների բացատրական աշխատանքը, որի շնորհիվ Էջմիածնում բնակվող 68-ամյա մի կին կամավոր հանձնել է հանգուցյալ ամուսնու «Կալաշնիկովի» ինքնաձիգն ու տարբեր տրամաչափի 40-ից ավելի փամփուշտը։ Առանց գործարանային համարի «Կալաշնիկովի» ինքնաձիգը, պահունակը, նռնակի պայթուցիչներն ու մի քանի տասնյակ փամփուշտը ոստիկանության Ապարանի բաժնում կամավոր հանձնել է Շենավան գյուղում բնակվող մի տղամարդ՝ շնորհիվ բաժնի հերթապահ մասի ծառայողների բացատրական աշխատանքի։
Ապօրինի պահվող զենք-զինամթերքի կամավոր հանձնման դեպքեր են արձանագրվել նաև ոստիկանության Տավուշի մարզային վարչության Նոյեմբերյանի, Իջևանի և Դիլիջանի բաժիններում։ Մասնավորապես, Նոյեմբերյանի բաժնում գործարանային համարով «Կալաշնիկովի» ինքնաձիգի, պահունակի և փամփուշտների, Իջևանի և Դիլիջանի բաժիններում՝ ատրճանակների և փամփուշտների։ Կրկին հորդորում ենք, ապօրինի զենք-զինամթերքը կամավոր հանձնել ոստիկանություն՝ քրեական պատասխանատվությունից խուսափելու համար։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
