Պետական եկամուտների կոմիտեն հանրային քննարկման է ներկայացրել «Վիճակախաղերի կազմակերպման գործունեությունից ստացվող եկամուտների հաշվառման ու դրա նկատմամբ հսկողության իրականացման կարգը սահմանելու մասին» ՀՀ կառավարության որոշման նախագիծը:
Նախատեսվում է սահմանել վիճակախաղերի կազմակերպման գործունեությունից ստացվող եկամուտների հաշվառման ու դրա նկատմամբ հսկողության իրականացման կարգը:
Սույն որոշումն ուժի մեջ մտնելուց հետո 15-օրյա ժամկետում հարկային մարմինը կհաստատի հսկիչ նշանի նմուշը և այն հաստատելուց հետո 90 օրվա ընթացքում կապահովի հսկիչ նշանների տպագրությունը և էլեկտրոնային գրանցումների կատարման համակարգի գործարկումը: Էլեկտրոնային գրանցումների կատարման համակարգի գործարկման և համակարգից օգտվելու ուղեցույցը հարկային մարմինը կտեղադրի իր պաշտոնական կայք էջում:
Նախագծի հիմնավորման մեջ նշվում է, որ նախագծով կսահմանվեն նաև հսկիչ նշանների ստացման, դրանց փակցման, էլեկտրոնային եղանակով հարկային մարմնի էլեկտրոնային համակարգում համապատասխան գրանցումներ կատարելու և չօգտագործված կամ վնասված հսկիչ նշանները հարկային մարմին վերադարձնելու հետ կապված հարաբերությունները:
