7-րդ գումարման Ազգային ժողովի պատգամավոր Տիգրան Ուրիխանյանը օրենքի նոր նախագիծ էր ներկայացրել խորհրդարան, որով առաջարկվում է փոփոխություններ կատարել «Կրթության մասին» օրենքում:

Այս նախագիծը վաղվա կառավարության նիստին ներկայացվելու է գործադիրի հավանությանը:

Նախագծով առաջարկվում է վճարովի հիմունքներով սովորողներին հնարավորություն տալ իրենց ուսման վարձը մուծել ըստ կիսամյակների կամ ամիսների:

Իսկ այն դրույթը, որով բարձրագույն ուսումնական հաստատությունները ըստ անհրաժեշտության կարող են սահմանել նաև ուսման վարձի ամսական վճարման մեխանիզմներ, առաջարկվում է ուժը կորցրած ճանաչել:

Պատգամավորը հիմնավորման մեջ նշել է, որ  բարձրագույն կրթության ոլորտում ներկայումս գոյություն ունեցող հիմնախնդիրներից իր սոցիալական նշանակությամբ հատկապես առանձնանում է ուսման վարձի վճարման հետ կապված խնդիրը, ինչը լուրջ դժվարություններ է ստեղծում բարձրագույն կրթություն ստանալու ցանկություն ունեցող, սակայն սոցիալական ոչ բարենպաստ պայմաններում գտնվող անձանց համար: Ընդ որում, խնդիրը կապված է ոչ միայն ուսման վարձի մեծ չափերի, այլ նաեւ դրա վճարման մեխանիզմի հետ: Մասնավորապես, համաձայն «Կրթության մասին» Հայաստանի Հանրապետության օրենքի 28-րդ հոդվածի 6-րդ կետի 5-րդ պարբերության «Վճարովի հիմունքներով սովորողներն ուսման վարձը կարող են մուծել ըստ կիսամյակների»: Միաժամանակ, նույն կետի 6-րդ պարբերության համաձայն՝ «Բարձրագույն ուսումնական հաստատությունները ըստ անհրաժեշտության սահմանում են նաեւ ուսման վարձի ամսական վճարման մեխանիզմներ»: Նման ձեւակերպումը որոշակիորեն խոցելի է, քանի որ ուսման վարձի ամսական վճարման մեխանիզմների սահմանումը թողնվում է բուհերի հայեցողությանը` հաշվի չառնելով բարձրագույն ուսումնական հաստատությունների վճարովի համակարգերում սովորողների շահերը:

Կրթության և գիտության նախարար Արայիկ Հարությունյանը փետրվարի 14-ին կառավարության հավանությանը կներկայացնի այս նախագիծը: Նախագծի վերաբերյալ եզրակացության մեջ նախարարությունը նշում է, որ «Կրթության մասին» օրենքում փոփոխություններ կատարելու մասին»  օրենքի նախագծի վերաբերյալ սկզբուն­­քային առարկություններ չունեն:

Այդուհանդերձ, ըստ ամիսների ուսման վարձավճարների գանձումների պարագայում բուհերի համար կարող են առաջանալ ֆինանսական խնդիրներ՝ ինչպես պայմանագրային պարտականությունների կատարման, աշխատավարձերի վճարման, այնպես էլ բուհի ենթա­կա­ռուցվածքների պահպանման կամ գործունեության համար անհրաժեշտ այլ ընթացիկ ծախ­սերի առումով: Առավել ևս, որ ուսանողների տեղա­փո­խության և վերա­կանգ­նումների գործ­ընթացներն (վերջինիս հետ կապված համապա­տաս­խան վճարումները՝ նաև կրե­դիտ­ներով պայմանավորված) իրականացվում են ըստ կիսամյակների:

Նախարարությունը նաև նշել է, որ ներկայումս վերանայման և լրամշակման փուլում է գտնվում «Բարձրագույն կրթության մասին» Հայաստանի Հանրապետության օրենքի նա­խա­գիծը, որում նախատեսված են կանոնակարգող դրույթներ՝ բուհերի ֆինանսավորման և ուսա­նողներին պետության կողմից կրթաթոշակների տրամադրման նոր սկզբունքների և մեխանիզմների մասով, ինչպես նաև կարիքավոր ուսանողներին, սոցիալական անապա­հո­վության չափանիշների և առաջա­դի­մության արդյունքների համակցմամբ, ուսման վարձի լրիվ կամ մասնակի փոխհատուցմամբ կրթաթոշակների տրամադրման վերաբերյալ։