Ազգային ժողովի պատգամավորներ Գալուստ Սահակյանը, Ռաֆիկ Գրիգորյանը, Գագիկ Մելիքյանը, Ռուզաննա Մուրադյանը, Մարգարիտ Եսայանը նոր օրենքի նախագիծ են մշակել, որով առաջարկում են «Բարձրագույն և հետբուհական մասնագիտական կրթության մասին» օրենքում լրացում կատարել:
Առաջարկվում է սահմանել, որ կրթության պետական կառավարման լիազորված մարմինը կարող է դադարեցնել բարձրագույն ուսումնական հաստատության լիցենզիայի գործողությունը նաև բարձրագույն ուսումնական հաստատության կողմից` Հայաստանի Հանրապետության օրենսդրությամբ սահմանված դիմորդների ընդունելության, սովորողների փոխադրման, տեղափոխման, ամփոփիչ ատեստավորման (քննությունների), դիպլոմային աշխատանքների պաշտպանության պահանջների խախտումների հայտնաբերման դեպքում:
Պատգամավորները հիմնավորման մեջ նշել են.
«Օրենքի նախագծի ընդունման անհրաժեշտությունը պայմանավորված է բարձրագույն մասնագիտական կրթական ծրագրերով գործունեության լիցենզավորման պայմանների եւ պահանջների, ինչպես նաեւ ՀՀ օրենսդրության պահանջների պահպանման նկատմամբ վերահսկողության եւ դրանք չպահպանելու դեպքում պատժամիջոցների կիրառման արդյունավետության բարձրացման անհրաժեշտությամբ:
Ներկայումս բարձրագույն մասնագիտական կրթական ծրագրերով գործունեության լիցենզիաների պայմանների եւ պահանջների ինչպես նաեւ օրենսդրական պահանջների խախտումների դեպքում պատժամիջոցների կիրառումը նախատեսված է «Լիցենզավորման մասին» ՀՀ օրենքով, սակայն տվյալ բնագավառի առանձնահատկությունները գործում են անարդյունավետ, այդ իսկ պատճառով անհրաժեշտություն է առաջացել դրանք ամրագրել «Բարձրագույն եւ հետբուհական մասնագիտական կրթության մասին» ՀՀ օրենքում, որի նպատակը կրթության որակի ապահովման երաշխիքների նոր գործիքակազմի բարելավումն է` բարձրագույն մասնագիտական կրթության համակարգում, բարձրագույն ուսումնական հաստատությունների անօրինական գործունեության նկատմամբ զսպող մեխանիզմերի կիրառման միջոցով՝ ընդհուպ մինչեւ լիցենզիայի գործողության դադարեցում` նպատակ ունենալով բարելավել ուսումնական հաստատություններում կրթական գործունեության անհրաժեշտ պայմաններն ու ուսուցման որակը:
Նախագծի ընդունմամբ ակնկալվում է՝ լիցենզիայի պայմանների, պահանջների եւ ՀՀ օրենսդրության խախտումների դեպքում պատժամիջոցների կիրառում, որը կնպաստի բարձրագույն կրթության բնագավառում իրականացվող կրթական գործունեության նկատմամբ պատասխանատվության բարձրացմանը»,-նշված է հիմնավորման մեջ:
Եվգենյա Համբարձումյան
