Մայիսի 2-ին, Ազգային ժողովի հատուկ նիստում վարչապետի միասնական թեկնածու Նիկոլ Փաշինյանը չընտրվեց ՀՀ վարչապետ 45 կողմ, 56 դեմ ձայնով: Դեմ է քվեարկել նաև Ազգային ժողովի պատգամավոր Աշոտ Արսենյանը: Իրավաբան.net-ը ներկայացնում է և՛ կողմ, և՛ դեմ քվեարկած պատգամավորների կենսագրությունները:

Աշոտ Արսենյանը ծնվել է 1960թ. նոյեմբերի 14-ին Վայոց Ձորի մարզի Գնդեվազ գյուղում (նախկինում՝ Ազիզբեկովի շրջան):

1980-1982թթ. ծառայել է խորհրդային բանակում:

1986թ. ավարտել է Երեւանի շինարարության տեխնիկական առաջադիմության համալսարանը: Տեխնիկ-շինարար:

1982-1984թթ. Ջերմուկի թիվ 6 ավտոբազայում աշխատել է գնորդ, 1985-1986թթ.` Սուրենավանի նավթամթերքի բազայի Ջերմուկի կայանի պետ, 1986-1988թթ.` Ջերմուկի թիվ 4 առողջարանի գլխավոր բժշկի տեղակալ: 1988թ. եղել է Ջերմուկի կուրորտմիավորման գլխավոր բժշկի տնտեսական գծով տեղակալ, 1993թ.` «Ջերմուկ» հանքային ջրի գործարանի տնօրեն, 1996թ.` Ջերմուկի քաղաքապետ: 1999թ. եւ 2002թ. վերընտրվել է Ջերմուկի քաղաքապետ, 1999թ.` «Ջերմուկ գրուպ» ՓԲԸ հիմնադիր նախագահ: Հայաստանի արդյունաբերողների եւ գործարարների միության վարչության, «Երկիր Նաիրի» հասարակական կազմակերպության պատվավոր անդամ:

2003-2007թթ.` Ազգային ժողովի պատգամավոր (համամասնական ընտրակարգ, ՀՀԿ): ԱԺ պետական-իրավական հարցերի մշտական հանձնաժողովի անդամ: «Հայաստանի Հանրապետական կուսակցություն» խմբակցության անդամ: ՀՀԿ անդամ:

2007-2012թթ.` Ազգային ժողովի պատգամավոր (համամասնական ընտրակարգ, ՀՀԿ): Ազգային ժողովի տնտեսական հարցերի մշտական հանձնաժողովի անդամ: «Հայաստանի Հանրապետական կուսակցություն» խմբակցության անդամ:

2012-2017թթ.՝ ԱԺ պատգամավոր (թիվ 39 ընտրատարածք): ԱԺ արտաքին հարաբերությունների մշտական հանձնաժողովի անդամ: «Հանրապետական» (ՀՀԿ) խմբակցության անդամ:

2017թ. ապրիլի 2-ին ԱԺ պատգամավոր է ընտրվել ՀՀԿ թիվ 12 ընտրատարածքի տարածքային ընտրական ցուցակով:

Պարգեւատրվել է Հայաստանի արդյունաբերողների եւ գործարարների միության ոսկե մեդալով (1999թ.), «Սուրբ Գրիգոր Լուսավորիչ» պատվո բարձրագույն շքանշանով (2007թ., Մայր աթոռ Ս. Էջմիածին ), «Հայրենիքին մատուցած ծառայությունների համար» 2-րդ աստիճանի մեդալով (2015թ.):

Ամուսնացած է, ունի երեք զավակ: