Գործադիրը վաղը՝ ապրիլի 5-ին որոշում կընդունի արդարադատության նախարարության կողմից ներկայացված նախագծի մասին։ Նախագծով լրացում կկատարվի ՀՀ կառավարության 2005 թվականի օգոստոսի  11-ի «Ամենամյա լրացուցիչ արձակուրդի իրավունք ունեցող առանձին կատեգորիայի աշխատողների ցանկը, այդ արձակուրդի նվազագույն տևողությունը և տրամադրման կարգը սահմանելու մասին» թիվ 1384-Ն որոշմամբ հաստատված հավելված N 1-ի 45-րդ կետից հետո․

45.1 Հայաստանի Հանրապետության արդարադատության նախարարության քրեակատարողական ծառայող՝

• մինչև 15 տարվա ծառայության ստաժի դեպքում – 2
• 15-25 տարվա ծառայության ստաժի դեպքում – 7
• 25 և ավելի տարվա ծառայության ստաժի դեպքում – 9

Մասնավորապես, «Քրեակատարողական ծառայության մասին» ՀՀ օրենքի 30-րդ հոդվածի 2-րդ մասի համաձայն.Նախագծի հիմանվորման մեջ նշվում է, որ նախկինում, ՀՀ արդարադատության նախարարության քրեակատարողական ծառայողներին արձակուրդ տրամադրելու իրավահարաբերությունները կարգավորվել են «Զինծառայողների և նրանց ընտանիքի անդամների սոցիալական ապահովության մասին» ՀՀ օրենքով, «Քրեակատարողական ծառայության մասին» ՀՀ օրենքով և այս օրենքներից բխող ենթաօրենսդրական ակտերով:

«Քրեակատարողական ծառայողի և նրա ընտանիքի անդամների սոցիալական ապահովության հարցերը կարգավորվում են «Զինծառայողների և նրանց ընտանիքի անդամների սոցիալական ապահովության մասին» Հայաստանի Հանրապետության օրենքով և այլ իրավական ակտերով»:

«Զինծառայողների և նրանց ընտանիքի անդամների սոցիալական ապահովության մասին» ՀՀ օրենքի 3-րդ հոդվածի 1-ին մասի գ) կետի համաձայն.

«Զինծառայողներին հավասարեցված անձինք են՝ (….)

գ) Հայաստանի Հանրապետության արդարադատության նախարարության քրեակատարողական ծառայողները, որոնց վրա տարածվում են սույն օրենքով նախատեսված դրույթները, (….):»:

Նույն օրենքի 32-րդ հոդվածի համաձայն.

 «Ժամկետային զինծառայողներին, Հայաստանի Հանրապետության օրենսդրությամբ սահմանված կարգով, տրվում է հերթական տարեկան արձակուրդ: Արձակուրդի տևողությունը կազմում է` մինչև 15 տարի ծառայած զինծառայողների համար` 30 օր, 15-ից 25 տարի ծառայած զինծառայողների համար` 40 օր, 25 և ավելի տարի ծառայած զինծառայողների համար` 45 օր, (….)»:»

Սակայն, ներկայումս, «Զինվորական ծառայության և զինծառայողի կարգավիճակի մասին» ՀՀ օրենքի ընդունմամբ ուժը կորցրած է ճանաչվել «Զինծառայողների և նրանց ընտանիքի անդամների սոցիալական ապահովության մասին» ՀՀ օրենքը, որի արդյունքում գործող օրենքով սահմանված արձակուրդի տրամադրման իրավահարաբերությունները քրեակատարողական ծառայության վրա չեն տարածվում:

 Մասնավորապես, վերոնշյալ օրենքի 72-րդ հոդվածի 2-րդ մասի 3-րդ կետի համաձայն.

«Զինծառայողներին հավասարեցված անձինք են` (….)

3) Հայաստանի Հանրապետության արդարադատության նախարարության քրեակատարողական ծառայողները, որոնց վրա տարածվում են սույն օրենքի 6-րդ բաժնի դրույթները (….):»:

Մինչդեռ, միևնույն օրենքի 6-րդ բաժնով կարգավորվում է միայն զինծառայողների դրամական ապահովությունը և սոցիալական ապահովությունը, և արդյունքում կարգավորումից դուրս է մնացել զինծառայողների արձակուրդային իրավահարաբերությունները:

 Միաժամանակ, «Քրեակատարողական ծառայության մասին» ՀՀ օրենքի 3-րդ հոդվածի 3-րդ մասի համաձայն.

«Քրեակատարողական ծառայողների և քաղաքացիական ծառայողների աշխատանքային հարաբերությունները կարգավորվում են Հայաստանի Հանրապետության աշխատանքային օրենսդրությամբ, եթե քրեակատարողական ծառայության և քաղաքացիական հատուկ ծառայության մասին օրենսդրությամբ այդ հարաբերությունները կարգավորող առանձնահատկություններ սահմանված չեն:»:

ՀՀ աշխատանքային օրենսգրքի 159-րդ հոդվածի 1-ին մասի համաձայն.

«Ամենամյա նվազագույն արձակուրդի տևողությունը հնգօրյա աշխատանքային շաբաթվա դեպքում 20 աշխատանքային օր է, իսկ վեցօրյա աշխատանքային շաբաթվա դեպքում` 24 աշխատանքային օր:»:

Նույն օրենսգրքի 161-րդ հոդվածի 2-րդ մասի համաձայն.

«Ամենամյա լրացուցիչ արձակուրդի իրավունք ունեցող առանձին կատեգորիայի աշխատողների ցանկը, այդ արձակուրդի նվազագույն տևողությունը և տրամադրման կարգը սահմանում է Հայաստանի Հանրապետության կառավարությունը:»:

Արդյունքում, կատարված օրենսդրական փոփոխությունների հետևանքով, ըստ էության, բաց է մնացել քրեակատարողական ծառայողների արձակուրդ տրամադրելու իրավունքի կարգավորումը և վերջիններիս ՀՀ աշխատանքային օրենսգրքով սահմանված կարգով արձակուրդ տրամադրելու դեպքում կվատթարանա նրանց իրավական վիճակը:

Ելնելով վերոգրյալից և հաշվի առնելով, որ ամենամյա լրացուցիչ արձակուրդի իրավունք ունեցող առանձին կատեգորիայի աշխատողների ցանկը և արձակուրդի նվազագույն տևողությունը սահմանվում է ՀՀ կառավարության 2005 թվականի օգոստոսի 11-ի թիվ 1384-Ն որոշմամբ, սույն նախագծով նախատեսվում է ՀՀ կառավարության վերոնշյալ որոշման մեջ կատարել համապատասխան լրացում՝ դրանով իսկ կանխելով ու վերացնելով քրեակատարողական ծառայողներին արձակուրդ տրամադրելու հետ կապված վերջիններիս իրավական վիճակի վատթարացումը:

Ներկայացված նախագծի ընդունմամբ հնարավոր կլինի լրացնել օրենսդրական բացը և ապահովել քրեակատարողական ծառայողների արձակուրդի իրավունքի արդյունավետ իրացումը։