Կառավարության այսօրվա նիստին գործադիրը որոշում ընդունեց բնակարան նվիրել պաշտոնաթող նախագահ Սերժ Սարգսյանին։ Նշենք, որ հարցը՝ չզեկուցվող էր։
Նախագծում նշված է․
«Հիմք ընդունելով «Պաշտոնատար անձանց գործունեության ապահովման, սպասարկման և սոցիալական երաշխիքների մասին» Հայաստանի Հանրապետության օրենքի 9-րդ հոդվածի 9-րդ մասը՝ Հայաստանի Հանրապետության կառավարությունը որոշում է.
1. Հայաստանի Հանրապետության նախագահի աշխատակազմի ենթակայության «Կոնդի առանձնատների տնտեսություն» պետական ոչ առևտրային կազմակերպության հաշվեկշռում ամրացված՝ 6-րդ մասնաշենքի մեջ մտնող շենքը և շինությունները՝ սպասարկման տարածքով՝ (1.5365 հա) հետ վերցնել և սեփականության իրավունքով անհատույց տրամադրել Հայաստանի Հանրապետության պաշտոնաթող նախագահ Սերժ Սարգսյանին՝ որպես բնակարան»:
Ինչպես նաև ընդունվել է ի գիտություն, որ որոշմամբ տրամադրվող գույքը սեփականատիրոջ կողմից տնօրինելու նպատակով Հայաստանի Հանրապետության քաղաքացիական օրենսգրքի 213-րդ հոդվածի համաձայն կնքվելու է կամավոր գույքային սերվիտուտի պայմանագիր։
Այս որոշումն ուժի մեջ է մտնում 2018 թվականի ապրիլի 9-ից։
