Գործադիրը մարտի 15-ին կայանալիք հերթական նիստի ժամանակ կքննարկի ներքին և արտաքին ազդարարման դեպքում հաղորդումների հաշվառման և ձևակերպման օրինակելի ձևի, ինչպես նաև ազդարարին տրվող պաշտպանության միջոցների ընթացակարգի մասին։
Արդարադատության նախարարության կողմից ներկայացված նախագծի հիմնավորման համաձայն, «Ազդարարման համակարգի մասին» Հայաստանի Հանրապետության օրենքի 5-րդ հոդվածի 2-րդ մաս ամրագրում է առ այն, որ ներքին և արտաքին ազդարարման դեպքում հաղորդումների հաշվառման, ձևակերպման օրինակելի ձևը, ինչպես նաև ազդարարին տրվող պաշտպանության միջոցների իրականացման ընթացակարգը սահմանում է ՀՀ կառավարությունը: Նույն հոդվածի 3-րդ մասի համաձայն՝ իրավասու մարմինն ինքնուրույն է սահմանում ներքին և արտաքին ազդարարման դեպքում հաղորդումների հաշվառման, ձևակերպման, ինչպես նաև ազդարարին տրվող պաշտպանության միջոցների իրականացման կարգը՝ որպես նվազագույն պահանջներ դիտարկելով Հայաստանի Հանրապետության կառավարության որոշման պահանջները:
«Ազդարարման համակարգի մասին» ՀՀ օրենքին համահունչ՝ «Ներքին և արտաքին ազդարարման դեպքում հաղորդումների հաշվառման և ձևակերպման օրինակելի ձևը, ինչպես նաև ազդարարին տրվող պաշտպանության միջոցների իրականացման ընթացակարգը սահմանելու մասին» կառավարության որոշման նախագծով առաջարկվում է՝
- սահմանել ներքին և արտաքին ազդարարման դեպքում հաղորդումների հաշվառման և ձևակերպման օրինակելի ձևը.
- սահմանել ազդարարին տրվող պաշտպանության միջոցների իրականացման ընթացակարգը:
Նախագծի համաձայն ներքին և արտաքին ազդարարման դեպքում հաղորդումների հաշվառման և ձևակերպման օրինակելի ձևակերպումը կսահմանվի հետևյալ կերպ՝
- Ներքին և արտաքին ազդարարման դեպքում հաղորդումների հաշվառման և հաղորդումներին ընթացք տալու համար պատասխանատու անձանց նշանակում է իրավասու մարմնի ղեկավարը՝ հաշվի առնելով իրավասու մարմնի կառուցվածքային առանձնահատկությունները:
- Իրավասու մարմինը հաղորդման հաշվառման և հաղորդումներին ընթացք տալու համար պատասխանատու անձանց տվյալները տեղադրում է իր կայքէջում, կայքէջի բացակայության դեպքում՝ իր օգտին աշխատանք կատարող կամ իր կողմից մատուցվող ծառայություններից օգտվող յուրաքանչյուր անձի համար տեսանելի վայրում:
- Ներքին և արտաքին ազդարարման դեպքում «Ազդարարման համակարգի մասին» Հայաստանի Հանրապետության օրենքով (այսուհետ՝ Օրենք) սահմանված ժամկետներում հաղորդումները պատասխանատու անձի կողմից հաշվառվում են գրանցամատյանում (Ձև 1)՝ համապատասխան գրառման կատարմամբ: Գրանցամատյանում հաշվառվում են նաև այն հաղորդումները, որոնք ներկայացվել են ոչ իրավասու մարմին, և վերջինս այն Օրենքով սահմանված կարգով վերահասցեագրել է իրավասու մարմնին:
- Գրանցամատյանում արձանագրվում են հետևյալ տեղեկությունները՝
- հաղորդման հաշվառման հերթական համարը.
- հաղորդման ներկայացման օրը, ամիսը, տարեթիվը.
- հաղորդումը ներկայացրած անձի անունը, ազգանունը և հայրանունը.
- հաղորդմամբ ներկայացված տեղեկության համառոտ բովանդակությունը.
- հաղորդման առնչությամբ ձեռնարկված միջոցների ամբողջական նկարագիրը.
- հաղորդման առնչությամբ ձեռնարկված միջոցների արդյունքը.
- նշումներ ազդարարին ծանուցելու յուրաքանչյուր դեպքի վերաբերյալ.
- ազդարարի ստորագրությունը.
- գրանցամատյանը վարողի ստորագրությունը.
- հաղորդման առնչությամբ այլ տեղեկություններ:
- Պատասխանատու անձը համարակալում, ստորագրում, իսկ փաստաթղթային տարբերակով վարման դեպքում՝ նաև կնքում է գրանցամատյանի բոլոր էջերը:
- Պատասխանատու անձը վարում է գրանցամատյանի փաստաթղթային կամ էլեկտրոնային տարբերակը:
- Հաղորդման հաշվառման նպատակով կազմվում և վարվում է գործ, որում պետք է պահվեն նաև գրանցամատյանում արձանագրված տեղեկություններին վերաբերող համապատասխան բոլոր նյութերի պատճենները։
