Հայաստանի 7 մարզերի 20 համայնքներում այսօր՝ մարտի 11-ին տեղի ունեցած տեղական ինքնակառավարման մարմինների ընտրություններին նախնական տվյալներով, մասնակցել է ընտրողների 44.91 տոկոսը կամ 10 246 ընտրող։
Այս մասին տեղեկանում ենք ՀՀ կենտրոնական ընտրական հանձնաժողովի պաշտոնական կայքից:
Մասնակցության ամենաբարձր ցուցանիշն արձանագրվել է Դեբետ համայքում՝ 74.35 տոկոս կամ 487 ընտրող։ Երկրորդ տեղում Նորամարգ համայնքն է, որտեղ ընտրություններին մասնակցել է ընտրողների 61,58 տոկոսը կամ 989 ընտրող։ Ամենացածր մասնակցությունը գրանցվել է Դաշտ եւ Մեծամոր համայնքներում, որտեղ ընտրություններին մասնակցել են ընտրողների շուրջ 28 տոկոսը։
Համայնքի ղեկավարի ընտրությունների քվեարկությանը մասնակցող 19 թեկնածուներից 8-ը առաջադրվել են ինքնաառաջադրմամբ, 9-ը՝ Հայաստանի Հանրապետական կուսակցության եւ 2-ը` Բարգավաճ Հայաստան կուսակցության կողմից:
