Մենք հստակ զգուշացում ունենք մեր Տիրոջից՝ զգուշանալ այն բոլոր լույսի կերպարանք առած պաշտոնյաներից, նրանց ներկայացրած բարեգործություն ներկայացվող բարեփոխումներից, որոնք իրականում չեն ծառայում Աստծուն, բոլորովին հաճո չեն Աստծուն: «Ընտանեկան բռնության կանխարգելման մասին» օրինագծի խորհրդարանական քննարկման ժամանակ «Հանուն քրիստոնեական ընտանիքի» նախաձեռնության համակարգող Կարինե Եսայանը ասաց, որ ծրագիրը հակաքրիստոնեական է:
«Մենք գտնում ենք, որ այս օրենքի նախագծով թիրախավորվում է հայ ընտանիքը: Հենց վերնագրից արդեն երևում է, որ թիրախավորված է ընտանիքը: Դարեր շարունակ ընտանիքը և հավատը եղել են այն սյուները, որոնց վրա հիմնված է եղել մեր ազգի գոյատևումը: Փորձում են ընտանիքը խարխլել, արմատախիլ անել, որպեսզի մեր հասարակության, մեր ժողովրդի յուրաքանչյուր անդամ դառնա խոցելի»,-նշեց նա:
Կարինե Եսայանը նկատեց նաև, որ այս ամենով մեզ փորձում են ընտելացնել Արևմուտքի արժեքներին. «Դուք Ձեր օրենքի նախագիծը փորձում եք հիմնավորել նրանով, որ 120 երկրներից ավելի արդեն ընդունել են այդ օրենքը: Գիտեք՝ Արևմուտքում բազմաթիվ երկրներ ընդունել են միասեռականների իրավունքները, միասեռականների սոցիալական ոլորտներում ներգրավվածության և խտրականության բացառումը: Դուք ուզում եք ասել, որ վաղը այս ամբիոնից այսպիսի օրինագիծ պետք է ներկայացնե՞ք»,-դիմեց նա Արդարադատության նախարարի տեղակալ Վիգեն Քոչարյանին:
Կազմակերպության ներկայացուցչի խոսքով՝ յուրաքանչյուր նախագիծ նախ պետք է մերժի կամ հաստատի Մայր Աթոռը. «Այս բռնությունների հիմքը հոգևոր դաստիարակության պակասն է, որովհետև կանայք չգիտեն, թե ըստ Սուրբ Գրքի որն է իրենց առաքելությունը»:
