Վերաքննիչ քրեական դատարանում ավարտվեց երրորդ խմբի հաշմանդամ Վարսիկ Կիրակոսյանի (անունը փոխված է) գործով բերված վերաքննիչ բողոքների քննությունը:
Նախքան վերաքննիչ բողոքը` գործը քննվել է Շենգավիթ վարչական շրջանի ընդհանուր իրավասության դատարանում: Ամբաստանյալի դեմ գործ էր հարուցվել քրեական օրենսգրքի 112-րդ հոդվածի 1-ին մասով: Տուժողը ամբաստանյալի փաստացի ամուսին Կարեն Վարդանյան է: Մեղսագրված արարքում ամբաստանյալը մասնակիորեն ընդունել է մեղքը:
Ըստ առաջին ատյանի ընդհանուր իրավասության դատարանի դատական ակտի՝ 2013 թվականի դեկտեմբերի 15-ին, երեկոյան բնակարանում ամբաստանյալը վիճաբանել է ամուսնու հետ, որի ընթացքում խոհանոցային դանակով հարվածել է ամուսնու որովայնին՝ նրա առողջությանը պատճառելով կյանքին վտանգ սպառնացող ծանր վնաս:
Նախաքննության ժամանակ Վարսիկ Կիրակոսյանը խոստովանել է, որ դիտավորյալ չի հարվածել ամուսնուն: Ինքը վատառողջ է, հիվանդության սրման փուլում է եղել, չի հասկացել, թե ինչ է անում:
Ինչպես հայտնի է, պաշտպանության կողմի միջնորդությամբ դատարանը նշանակել է դատահոգեբուժական-դատահոգեբանական հանձնաժողովային համալիր փորձաքննություն, որի եզրակացության համաձայն` Վարսիկ Կ-ն հանդիսանում է «անձի հիստերիկ խանգարում՝ տագնապային ու դեպրեսիվ խանգարումներով» ախտորոշմամբ փսիխոպատ անձնավորություն՝ նևրոտիկ մակարդակի հոգեկան գործունեության խանգարումներով: Նա ճանաչվել էր սահմանափակ մեղսունակ:
Շենգավիթ վարչական շրջանի առաջին ատյանի ընդհանուր իրավասության դատարանը ամբաստանյալին մեղավոր է ճանաչել ամուսնու առողջությանը դիտավորությամբ ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով, և դատապարտել է 3 տարի 6 ամիս ազատազրկման և վճռել է հօգուտ ՀՀ պետական բյուջեի բռնագանձել 70 հազար 74 դրամ գումար` որպես դատական ծախսեր։
Ամբաստանյալը վերաքննիչ բողոք է ներկայացրել՝ խնդրելով իր նկատմամբ պայմանական դատապարտություն կիրառել, իրական ազատազրկման չդատապարտել իրեն կամ սահմանել օրենքով նախատեսվածից ավելի մեղմ պատիժ:
Վերաքննիչ դատարանը` նախագահող Հենրիկ Գադիշի Տեր-Ադամյանի, որոշեց Վարսիկ Կ-ի վերաքննիչ բողոքները բավարարել:
ՀՀ քրեական օրենսգրքի 112-րդ հոդվածի 1-ին մասով Երևան քաղաքի Շենգավիթ վարչական շրջանի ընդհանուր իրավասության առաջին ատյանի դատարանի դատավճիռը պատժի մասով փոփոխել:
Նրա նկատմամբ ՀՀ քրեական օրենսգրքի 112-րդ հոդվածի 1-ին մասով Երևան քաղաքի Շենգավիթ վարչական շրջանի ընդհանուր իրավասության առաջին ատյանի դատարանի դատավճռով նշանակված պատիժը` ազատազրկում 3 տարի 6 ամիս ժամկետով, ՀՀ քրեական օրենսգրքի 70-րդ հոդվածի կիրառմամբ պայմանականորեն չկիրառել և սահմանել փորձաշրջան 3 տարի ժամկետով:
Լ.Մ.
