Արտադրվող եւ պատրաստվող դեղերը պետք է լինեն պիտակավորված։ Պիտակը, պիտակավորված փաթեթը, թուղթ-ներդիրը, դեղի օգտագործման հրահանգը ինքնանպատակ չեն, դրանց մանրամասն ընթերցումը անհրաժեշտ է յուրաքանչյուր անգամ դեղ գնելի և/կամ այն օգտագործելիս:
Հայաստանի երիտասարդ իրավաբանների ասոցիացիայի իրավաբան Գոհար Կոստանյանի փոխանցմամբ` դեղի պիտակը և թուղթ-ներդիրները պետք է պարունակեն տվյալներ` հաստատված պահանջներին դեղի համապատասխանության և նախազգուշացումներ` դեղաչափի գերազանցումից առաջացած վտանգի եւ դեղը երեխաներին անմատչելի տեղերում պահելու մասին։
Գոհար Կոստանյանի խոսքով` դեղի արտաքին կամ առաջնային փաթեթավորման վրա պարզ պետք է ընթերցվի դեղն արտադրող ֆիրմայի հասցեն եւ անունը, դեղի անվանումը, գրանցման համարը, պատրաստման ամսաթիվը, օգտագործման ձեւը, յուրաքանչյուր միավորի կշիռը (ծավալը) եւ քանակը, պիտանիության ժամկետը, պահպանման պայմանները։
Եթե դեղը ստացվել է գենային ինժեներիայի մեթոդներով, ապա այդ մասին պարտադիր նշվում է դեղի պիտակի վրա կամ թուղթ-ներդիրում, մասնավորապես, նշվում են դեղի պատրաստման համար օգտագործված ակտիվ նյութը եւ ձեւափոխված միկրոօրգանիզմները։
Դեղի պատրաստման դեղաբուսական հումքը չպետք է պարունակի ռադիոակտիվ նյութեր։ Այն պետք է պիտակավորվի «Արտադրանքը ենթարկվել է ճառագայթային ստուգման» նշումով, իսկ հոմեոպատիկ դեղի պիտակում պետք է լինի «հոմեոպատիկ» նշումը։
Աղբյուրը` Իրավաբան.net