Այսօր Հայաստանի առողջապահության աշխատողների արհեստակցական կազմակերպությունների հանրապետական միության 4-րդ համագումարի պատվիրակները բաց նամակ են ուղղել Հայաստանի նախագահ Սերժ Սարգսյանին: Նամակում նրանք դժգոհում են բժիշկների իրավունքների ոտնահարման դեպքերից.
«Հերթական համագումարի պատվիրակները, ներկայացնելով ճյուղի ավելի քան քսան հազար աշխատողների շահերը, լուրջ մտահոգություն են հայտնում առողջապահության ոլորտում ստեղծված ներկայիս իրավիճակի կապակցությամբ:
Վերջին տարիներին տագնապալի չափերի են հասնում բժիշկների նկատմամբ բռնության դեպքերը: Մասնագիտական պարտականությունները կատարելիս բուժաշխատողներն «արժանանում են» վիրավորանքների, ենթարկվում ծեծի, իսկ Գյումրիում շտապ օգնության բժշկի այցն ավարտվեց վերջինիս մահով: Համագումարի պատվիրակները խիստ դատապարտում են նաեւ հունիսի 17-ին «Հարսնաքար» ռեստորանում ռազմական բժիշկներին դաժան ծեծի ենթարկելու դեպքը, որը դարձավ Վահե Ավետյանի մահվան պատճառ:
Համագումարի մասնակիցները գտնում են, որ ստեղծված իրավիճակը պայմանավորված է նախ եւ առաջ առողջապահության ոլորտում առկա խորը համակարգային խնդիրներով: Առ այսօր բոլոր իրականացվող բարեփոխումները, այդ թվում` համավճարային նոր համակարգի ներդրումը, չեն լուծում ամենակարեւոր` բնակչության լայն շերտերի համար բժշկական ծառայությունների հասանելիության խնդիրը:
Մարդկանց օրեցօր աճող դժգոհությունը ոլորտից առավել հաճախ վեր է ածվում ագրեսիայի հիվանդների հետ անմիջական շփման մեջ գտնվող բժիշկների հանդեպ:
Գոյություն ունեցող հիմնախնդիրները շարունակ կխորանան, քանի դեռ պետության կողմից առողջապահության` որպես ազգի անվտանգության կարեւորագույն ինստիտուտի, ֆինանսավորման մակարդակը շարունակում է մնալ ընդամենը ՀՆԱ-ի 1,5 %-ի սահմանում, քանի դեռ ճյուղում պահպանվում է կանխիկ, ֆորմալ կամ ոչ ֆորմալ վճարումներ կատարելու անհրաժեշտությունը բուժսպասարկում ստանալու պահին, հատկապես բուժծառայությունների գների զգալի աճի պայմաններում, քանի դեռ չի գործում պարտադիր բժշկական ապահովագրությունը` որպես քաղաքացիների սոցիալական պաշտպանության համակարգ, քանի դեռ օրենսդրական մակարդակով կանոնակարգված չեն ՙհիվանդ եւ նրա հարազատներ – բուժաշխատող՚ հարաբերությունները, հստակեցված չեն նրանց իրավունքները, պարտականությունները եւ պատասխանատվությունները:
Համագումարի պատվիրակները հույս են հայտնում, որ Դուք` որպես Հայաստանի Հանրապետության Սահմանադրության երաշխավոր, կդրսեւորեք քաղաքական կամք եւ կձեռնարկեք անհետաձգելի միջոցներ` ապահովելու որակյալ եւ մատչելի բժշկական օգնություն ստանալու յուրաքանչյուր քաղաքացու սահմանադրական իրավունքը եւ բուժաշխատողների աշխատանքի անվտանգության իրավունքը»։
Բուժաշխատողները դժգոհում են նախագահին իրենց իրավունքների պաշտպանության ցածր մակարդակից
![](/banner/iravaban-net_840x90.png)
![](https://iravaban.net/wp-content/uploads/2012/05/1_b.jpg)