Iravaban.net-ը ուսումնասիրել է Բարձրագույն դատական խորհրդի թիվ ԲԴԽ-72-Ո-136 որոշումը, որով երեք դատավորի անուն-ազգանունները ժամանակավորապես հանվել են գործերի բաշխման ցանկից: Որոշումը կայացվել է 2025թ. հոկտեմբերի 14-ին:

Որոշման հիմքերը և բովանդակությունը

Բարձրագույն դատական խորհուրդն իր որոշման մեջ հիմք է ընդունել Վճռաբեկ դատարանի դատավոր Նաիրա Հովսեփյանի, Երևան քաղաքի առաջին ատյանի ընդհանուր իրավասության քրեական դատարանի դատավոր Գնել Գասպարյանի և Երևան քաղաքի առաջին ատյանի ընդհանուր իրավասության քաղաքացիական դատարանի դատավոր Անուշավան Մուշեղյանի աշխատանքային ծանրաբեռնվածության վերաբերյալ գրությունները, ինչպես նաև համապատասխան դատարանների նախագահների համաձայնությունները:

Որոշումը կայացվել է «Հայաստանի Հանրապետության դատական օրենսգիրք» սահմանադրական օրենքի 42-րդ հոդվածի 2-րդ մասի և 94-րդ հոդվածի 1-ին մասի հիման վրա:

Որոշման կիրառման ժամկետները

Ըստ Բարձրագույն դատական խորհրդի որոշման՝

1. Վճռաբեկ դատարանի դատավոր Նաիրա Հովսեփյանի անուն-ազգանունը հանվել է գործերի բաշխման ցանկից վեցամսյա ժամկետով՝ 2025 թվականի հոկտեմբերի 15-ից մինչև 2026 թվականի ապրիլի 15-ը ներառյալ:
2. Երևան քաղաքի առաջին ատյանի ընդհանուր իրավասության քրեական դատարանի դատավոր Գնել Գասպարյանի անուն-ազգանունը (բացառությամբ մինչդատական վարույթի դատական երաշխիքների վարույթների) հանվել է գործերի բաշխման համակարգչային ծրագրի ցանկից երկամսյա ժամկետով՝ 2025 թվականի հոկտեմբերի 15-ից մինչև 2025 թվականի դեկտեմբերի 15-ը ներառյալ:
3. Երևան քաղաքի առաջին ատյանի ընդհանուր իրավասության քաղաքացիական դատարանի դատավոր Անուշավան Մուշեղյանի անուն-ազգանունը հանվել է գործերի բաշխման ցանկից երկամսյա ժամկետով՝ 2025 թվականի հոկտեմբերի 15-ից մինչև 2025 թվականի դեկտեմբերի 15-ը ներառյալ:

Որոշման ուժի մեջ մտնելը

Որոշումն ուժի մեջ է մտնում հրապարակմանը հաջորդող օրվանից, այսինքն՝ 2025 թվականի հոկտեմբերի 15-ից: Որոշումը ստորագրել է Բարձրագույն դատական խորհրդի նախագահ Արթուր Աթաբեկյանը, – այս մասին տեղեկացնում է Iravaban.net–ը։