Երևանի թատրոնի և կինոյի պետական ինստիտուտի ուսանողները մարտի 20-ին պատրաստվում են դասադուլ անել։ Այս մասին հայտարարություն է տարածել ուսանողներից մեկը։
Նշվում է, որ պատճառն այն է, որ համալսարանի ռեկտորը՝ Լիլիթ Արզումանյանը, արգելել է դասախոս, Հայաստանի ժողովրդական արտիստ Նիկոլայ Ծատուրյանի ղեկավարած երրորդ կուրսի ներկայացումը, որը բեմադրված է Էդգար Կոստանդյանի «Որբանոց» ստեղծագործության հիման վրա։
Ուսանողները պնդում են, որ արգելքը անհիմն է, ռեկտորն անգամ չի դիտել ներկայացումը։
Թեմային է անդրադարձել նաև գրող Էդգար Կոստանդյանը։ Նա նշել է, որ ռեկտորն արգելել է ներկայացումը, որովհետև ուսանողական թատրոնի բեմից հայհոյանք է հնչել:
«Էդ էրեխեքը դեռ լիքը ներկայացումներ են խաղալու, շատ մեծ բեմերում են խաղալու, ձեզ մնալու է ձեր մաղձն ու փոքրոգությունը: Ու հենց էդ ամեն ինչը տակից հանենք, կպարզվի՝ ոչ մի սարսափելի բան չի կատարվել, հակառակը՝ ուսանողները դեռ ինստիտուտը չավարտած՝ արդեն արգելված ներկայացում ունեն. կարիերայի նախանձելի սկիզբ…
Հ.Գ. Էրեխեք, հանկարծ չչարանաք: Գրկում եմ: Որբանոցի կենացը»,-նշել է նա:
