Ծավալուն օպերատիվ միջոցառումների արդյունքում ոստիկանության Արաբկիրի բաժնի քրեական հետախուզության բաժանմունքի ծառայողները հոկտեմբերի 26-ին տեղեկություն ստացան, որ մի շարք, այդ թվում՝ առանձնապես ծանր հանցագործությունների մեղադրանքներով հետախուզվող 37-ամյա տղամարդը Կոտայքի մարզի Զովունի գյուղի գերեզմանոցում է։
Այս մասին հայտնում են ոստիկանությունից։
Ժամը 20.10-ի սահմաններում Երևան քաղաքի վարչության և Արաբկիրի բաժնի քրեական հետախույզները նրան հայտնաբերեցին ու բերման ենթարկեցին Արաբկիրի բաժին։ Անձնական խուզարկությամբ նրա մոտից հայտնաբերվեց «Կալաշնիկովի» ինքնաձիգ՝ լիցքավորված 30 փամփուշտով։
Երևանի Ֆուչիկի փողոցում հաշվառված տղամարդը 2020 թվականից ոստիկանության Մաշտոցի բաժնի կողմից հետախուզվում էր սպանության փորձի, կողոպուտների, գողության, գույքը դիտավորությամբ ոչնչացնելու կամ վնասելու մեղադրանքներով։ Բացի այդ, դարձյալ 2020 թվականից, ՌԴ իրավապահների կողմից հետախուզվում էր սպանության փորձի մեղադրանքով:
Խափանման միջոցը՝ կալանք։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
