Շիրակի մարզի դատախազությունում հարուցվել է քրեական գործ` առևտրային կազմակերպության տնօրենի կողմից լիազորությունները չարաշահելու և փաստթղթեր կեղծելու դեպքերի առթիվ:

Նախապատրաստված նյութերով պարզվել է, որ առևտրային կազմակերպության տնօրենը 2011թ. հուլիսի 28-ին կազմակերպության Գյումրիի մասնաճյուղի նախկին վարկառուներից մեկի անվամբ, առանց վերջինիս գիտության, ձևակերպել և ստացել է 12 000 ԱՄՆ դոլարի չափով վարկ:

Մասնավորապես` առանց համապատասխան քվորում ապահովելու, հաճախորդի տուն այցելելու, բիզնես վերլուծություն կատարելու, առանց տրված վարկի գումարը շարժական գույքի գրավով ապահովելու` առևտրային վարկային փաթեթներից պատճենահանել է նախկին վարկառուի անձնագրի պատճենը, ՍՊ ընկերություններից մեկից նրա անվամբ ձեռք է բերել իրավունք վերապահող աշխատավարձի չափի մասին կեղծ տեղեկանք:

ՀՀ դատախազության պաշտոնական կայք էջը տեղեկացնում է, որ դեպքի առթիվ Շիրակի մարզի դատախազությունում հարուցվել է քրեական գործ` ՀՀ քրեական օրենսգրքի 214-րդ և 325-րդ հոդվածների 1-ին մասերով:
Քրեական գործի նախաքննությունը հանձնարարվել է ՀՀ ԿԱ ոստիկանության Շիրակի մարզի քննչական բաժնին:

Նյութի սկզբնաղբյուրը հանդիսանում է www.datalex.am կայքը:

Ծանուցում. Հանցագործության մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Աղբյուրը` Իրավաբան.net