Վերջին օրերին սոցցանցերում բուռն կերպով քննարկվում է փետրվարի 21-ին «Թափառող կենդանիների վնասազերծման կենտրոն» ՀՈԱԿ բերված 3 կենդանիների հետ կապված միջադեպը: Կենտրոնը միջադեպի վերաբերյալ հայտրաարություն է տարածել․

«Ուստի, ավելորդ շահարկումներից խուսափելու և միաժամանակ ՀՈԱԿ-ի աշխատանքներին մշտապես «աջակցող» մի խումբ մարդկանց կողմից կազմակերպած սադրանքը կանխելու նպատակով, ստորև ներկայացնում ենք դեպքի մանրամասները՝ 21.02.2020 թ, ժ 15:00-ի մոտակայքում, Վահագն անունով անձի կողմից, որին ճանաչում ենք, որպես ԴԻՆԳՈ ՀԿ-ի վարորդ, ավտոմեքենայով ԹԿՎԿ ՀՈԱԿ-ի ժամանակավոր կլինիկա են բերվում մեկ վանդակի մեջ տեղակայված թվով 3 կենդանի՝ ստերջացման նպատակով: կենդանիներից երկուսը, նախնական բուժզննում անցնելուց հետո, վիրահատական միջամտության հակացուցումներ չունենալով, ուղարկվում են ստերջացման, իսկ 3-րդ շան հետազոտման ընթացքում հայտնաբերվում են հակացուցումներ՝ բարձր ջերմություն, թարախային քթարտադրություն, խզզոցներ թոքերում և աղիների բորբոքում, որոնք ինֆեկցիոն որոշ հիվանդությունների, մասնավորապես գիշատիչների ժանտախտի կլինիկական նշաններ են համարվում: Հետազոտող բժիշկը տեղեկացնում է գլխավոր անասնաբույժին իր կասկածի վերաբերյալ և միաժամանակ կապ է հաստատվում Վահագնի հետ, որին տեղեկացվում է, որ շան մոտ առկա են վերը նշված ախտանիշները, և հնարավոր է, որ նա ինֆեկցիոն հիվանդ է, որին չի կարելի վիրահատել: Եվ, քանի որ ՀՈԱԿ-ում այդ պահին, գնումների գործընթացի հետ կապված, ժանտախտի ախտորոշման էքսպրես թեսթեր առկա չեն լինում, խնդրվում է հնարավորություն դեպքում դա բերվի: Վահագնը պատասխանում է, որ այո, իրենք էլ են նկատել թարախային քթահոսքը, կասկածել, որ կենդանին հիվանդ է ժանտախտով, տարել են բժշկի, որտեղ դրվել է այդ թեսթը, որը բացասական է եղել: Մեր խնդրանքին, որ եթե հնարավոր է թեսթը բերվի, ևս մեկ անգամ համոզվելու համար, նա համաձայնվում է: Կենդանին, բուժակի հսկողության ներքո, թողնվում է սեղանի վրա և 10-15 րոպե անց կենդանու մոտ սկսում է ի հայտ գալ սիրտ թոքային անբավարարության նշաններ, և չնայած ձեռնարկված վերակենդանացնող միջոցառումներին, կենդանուն հնարավոր չի լինում փրկել: Անմիջապես կապ է հաստատվում Վահագնի հետ, տեղեկացնելով դեպքի մասին: Որոշ ժամանակ անց, Վահագնը այնուամենայնիվ բերում է թեստը, որի արդյունքը կրկին բացասական է լինում: Վահագնի հետ միասին ժամանում է իգական սեռի մի ներկայացուցիչ՝ Նատա Բուդաղյան անունով և հայտնում, որ շունը իրենն է, և որ ՀՈԱԿ-ում դիտմամբ են կազմակերպել շան սպանությունը: Այնուհետև, զանգահարում է ոստիկանություն և հայտնում դեպքի մասին, միաժամանակ պահանջելով վերադարձնել մնացած 2 կենդանուն: Հաշվի առնելով կենդանու մոտ ինֆեկցիոն հիվանդություններին բնորոշ բոլոր ախտանիշների առկայությունը և այն հանգամանքը, որ նման թեսթերի (հատկապես չինական արտադրության) սխալի հավանականությունը 50% և ավել է, կենդանու դիակը սահմանված ձևով փաթեթավորվում, տեղադրվում է սառցարանում, հիվանդության հետագա ախտորոշման համար: Որից հետո տարածքը ախտահանվում է, դեպքի մասին զեկուցվում է ՀՀ ԳՆ ՍԱՊԾ պետի տեղակալին: Միևնույն ժամանակ, նույն վանդակում գտնված և ինֆեկցիոն նախանշաններ ունեցող շան հետ շփված մյուս 2 կենդանիների նկատմամբ սահմանվում է հսկողություն (պարբերաբար ջերմաչափում, կլինիկական վիճակի ստուգում, թոքերի աուսկուլտացիա և այլն):

24.02.2020թ դիակը ոստիկանության կողմից ուղարկվում է ՀՀ ԳՆ ՍԱՊԾ «Հանրապետական անասնաբուժասանիտարական և բուսասանիտարական լաբորատոր ծառայությունների կենտրոն» ՊՈԱԿ փորձաքննության: Զուգահեռ, ՍԱՊԾ պետի հետ խորհրդակցելուց հետո, որոշվում է կենդանիներին պատվաստել կոմպլեքս պատվաստանյութով՝ ժանտախտի, լեպտոսպիրոզի, ինֆեկցիոն հեպատիտի, պարվովիրուսային էնտերիտի և կատաղություն հիվանդությունների դեմ: Որպես կանոն, 14 օրյա ժամկետում, կենդանիների մոտ ինֆեկցիոն հիվանդության նախանշաններ կամ հիվանդություն չզարգանալու դեպքում, կենդանիները վերադարձվում են իրենց տարածք կամ հանձնվում են խնամակալին:

Այժմ մի փոքր ծանոթացում, թե ինչպես է կլինիկայում կազմակերպվում շների ստուգման և ստերջացման գործընթացը: Կենդանին բերվելով կլինիկա, անցնում է նախնական հետազոտություն , որպեսզի բացահայտվեն առկա բոլոր հակացուցումները և հետո նոր կատարվի ստերջացումը: Առավել ակտիվ և ագրեսիվ կենդանիներին ներարկվում է քսիլա կոչվող դեղանյութը՝ 1կգ/ 2-3մգ չափաբաժնով: Հասարակության այն զանգվածի համար, որոնք ծանոթ չեն այդ դեղանյութին և նրա կիրառման պայմաններին, նշենք, որ քսիլան նշանակվում է շների և կատուների համար՝ կլինիկական քննությունների, ռենտգեն հետազոտությունների ընթացքում՝ ցավազրկման և մկանների թուլացման նպատակով, անհանգստացնող և ագրեսիվ կենդանիներին հանգստացնելու համար, ներառյալ տեղափոխման ժամանակ. որպես սեդատիվ միջոց վիրաբուժական միջամտությունների, ցավոտ մանիպուլյացիաների, ինչպես նաև տեղական և ընդհանուր անզգայացման նպատակով: Քսիլան արգելվում է օգտագործել կենդանիների ստամոքս-աղիքային տրակտի անանցանելության (կերակրափողի խցանում, ստամոքսի ոլորում և ճողվածք) դեպքում, շաքարախտով և սրտի մկանների անցանելիության խանգարման պատմությամբ, ինչպես նաև հղիության վերջին երրորդ շրջանում`պայմանավորված դեղամիջոցի օքսիթոցինանման ազդեցությամբ:

Խնդրում ենք ուշադրություն դարձնել այն փաստի վրա, որ վերը թվարկված ախտանիշներից ոչ մեկը տվյալ կենդանու մոտ առկա չի եղել, և ցուցված չափաբաժնից կենդանուն ներարկվել է 1կգ/2մգ դեղանյութ:

Ամփոփելով վերոգրյալը, ևս մեկ անգամ խնդրում ենք բոլոր քաղաքացիներին, հատկապես կենդանասեր ակտիվիստներին, ամբողջությամբ չտիրապետելով միջադեպերի մանրամասներին, հանդես չգալ ոչ մասնագիտական և հատկապես ՀՈԱԿ-ի գլխավոր անասնաբույժին ուղղված անհիմն մեղադրանք հնչեցնող հայտարարություններով՝ ստեղծելով արհեստական խուճապ, և վերջապես չխոչընդոտել ՀՈԱԿ-ի աշխատանքներին»,-նշել է նա: