Նոր Հայաստանում կազմակերպվեց շինծու մեղադրանքով քրեական գործ, որը ոչ մի աղերս չունի իրավական կամ օրինական լինելու հետ: Այս մասին այսօր՝ հոկտեմբերի 2-ին, մամուլի ասուլիսի ժամանակ ասաց Պետական վերահսկողական ծառայության պետ Դավիթ Սանասարյանը (լիազորությունները ժամանակավորապես կասեցված են):
«Մինչև քրեական գործ սկսելը, ամիսներ շարունակ, երկրի վարչապետին իմ վերաբերյալ զեկուցվում էր սխալ ինֆորմացիա՝ արդեն թոշակի գնացած մի պաշտոնյայի կողմից: Բոլորդ գիտեք, ավտոմեքենայի վերաբերյալ խոսակցություները, տարատեսակ սուտ ինֆորմացիաներ, որ ես լսում էի՝ վարչապետի կողմից հարցեր էին հնչեսվում, թե ինչ կապ ունեն այդ ինֆորմացիաներն իմ հետ: Ամեն անգամ ես վարչապետին ներկայացրել եմ, որ դրանք կեղծ են, և հենց ԱԱԾ համապատասխան ծառայությունների կողմից արված լայնածավալ, մեծառեսուրս գործողությունների արդյունքում իրենք փաստեցին, որ նման բաներ չկան: Իրենք խոսեցին, իրենք հերքեցին դրա մասին: Հիշենք, որ տեսանյութեր կային, որտեղ ես կաշառ էի վերցնում. այդ տեսանյութերը, հավաստիացնում եմ, այլ քրեական հոդվածով՝ կաշառքի, ավելի ծանր հոդվածով գործը կընթանար»,-նշեց Դավիթ Սանասարյանը:
Նրա խոսքով, կառավարության նիստերից հետո տեղի ունեցող ճեպազրոյցների ժամանակ նա նշել է, որ փորձ է արվում վարչապետի և իր միջև սեպ խրել: Դավիթ Սանասարյանի խոսքով, դատախազության հանցակցությամբ է իր վերաբերյալ քրեական գործը հաստատվեց և ուղարկվեց դատարան, ինչը որոշ չափով ուրախալի է, քանի որ հանրությունը չի կարող ասել, թե կոռուպցիոների գործը կոծկլվել է և այժմ բաց դատական գործընթաց կլինի:
Հիշեցնենք, որ ՀՀ ազգային անվտանգության ծառայության տեղեկացմամաբ, ՊՎԾ պաշտոնատար անձանց կողմից պաշտոնեական լիազորությունները չարաշահելու և ծանր հետևանքներ առաջացնելու, մի խումբ անձանց կողմից նախնական համաձայնությամբ փաստաթղթեր կեղծելու, իրացնելու և օգտագործելու դեպքերի առթիվ 2019 թվականի փետրվարի 20-ին ՀՀ ԱԱԾ քննչական դեպարտամենտում ՀՀ քրեական օրենսգրքի 308-րդ հոդվածի 2-րդ մասով և 325-րդ հոդվածի 2-րդ մասով հարուցված քրեական գործի նախաքննությամբ ձեռք բերված բավարար ապացույցների համակցության հիման վրա 2019 թվականի ապրիլի 18-ին Դավիթ Սանասարյանին մեղադրանք է առաջադրվել ՀՀ քրեական օրենսգրքի 308-րդ հոդվածի 1-ին մասով (Պաշտոնեական լիազորությունները չարաշահելը):
