Հարկային մարմնում ծառայողական քննություն անցկացվում է հարկային մարմնի ղեկավարի որոշմամբ:

Հարկային մարմնի ծառայողական քննություն անցկացնող հանձնաժողովի անհատական կազմը հաստատում է հարկային մարմնի ղեկավարը` Հայաստանի Հանրապետության կառավարության սահմանած կարգով առաջարկված թեկնածուներից:

Հարկային մարմնի ծառայողական քննություն անցկացնող հանձնաժողովը`

1) հսկողություն է իրականացնում հարկային ծառայողների վարքագծի կանոնների նկատմամբ.

2) ծառայողական քննություն է անցկացնում հարկային մարմնի ղեկավարի սահմանած կարգով.

3) եզրակացություն է ներկայացնում հարկային մարմնի ղեկավարին` սահմանված կարգով հետագա ընթացքն ապահովելու նպատակով, այսինքն` որպեսզի կայացվի հետևյալ որոշումներից մեկը`

• եզրակացությունը թողնել անհետևանք,

• եզրակացությունը վերադարձնել լրացուցիչ քննության,

• վերանայել պատասխանատվության ձևը,

• արձակել հրաման՝ հարկային ծառայողին կարգապահական կամ նյութական պատասխանատվության ենթարկելու համար:

Հարկային ծառայողների ծառայողական քննություն իրականացնում է հարկային մարմնի ծառայողական քննություն անցկացնող հանձնաժողովը` հարկային մարմնի ղեկավարի լիազորած հարկային մարմնի կառուցվածքային ստորաբաժանման միջոցով:

Աղբյուրը` Իրավաբան.net